वासिङ्टन- अमेरिकी विदेशमन्त्री मार्को रुबियोले इरानी आणविक स्थलमा अमेरिकी आक्रमणपछि महत्वपूर्ण व्यापारिकमार्ग होर्मुज जलमार्ग बन्द गर्नबाट रोक्न इरानसँग समन्वय गर्न चीनसँग आग्रह गरेका छन्।

तेल निर्यातको दृष्टिबाट यो जलमार्ग निकै महत्त्वपूर्ण छ। किनकी इराक, कतार तथा इरान जस्ता देशहरूको तेल निर्यात यहीमार्ग हुँदै हुने गर्छन्।

रुबियोले फक्स न्यूजसँग भनेका छन्, ‘म चीन सरकारलाई यस विषयमा कुरा गर्न आग्रह गर्दछु। खासगरी, इराक कतार र इरानबाट निर्यात हुने तेलका लागि स्ट्रेट अफ होर्मुजको प्रयोग हुनेगर्छ र यो चीनमा इन्धन आयातका लागि पनि प्रमुखमार्ग मानिन्छ।’

विश्लेषकहरूले इरानले वासिङ्टनले आइतबार बिहान गरेको आक्रमणको बदलामा सामुद्रिकमार्गमा पर्ने हर्मुज स्ट्रेट बन्द गर्न सक्ने बताएका छन्। ‘यदि इरानले हर्मजमार्ग रोक्ने बाटो अपनायो भने यो अर्को भयानक गल्ती हुनेछ। इरानी शासकले हर्मुज स्ट्रेटमा आवागमनलाई रोक्नु उनीहरूको लागि आर्थिक संकट निम्त्याउने कडी बन्न सक्छ। हामीसँग यसको सामना गर्ने विकल्पहरू छन्’ विदेशमन्त्री रुबियोले भने।

तर, अन्य देशले पनि यसलाई हेर्नुपर्ने, अन्य देशको अर्थतन्त्रलाई अमेरिकाभन्दा धेरै नराम्रो असर पार्ने उनकाे भनाइ छ। साथै यसले संकटग्रस्त विश्व अर्थतन्त्रलाई थप समस्यातर्फ धकेल्ने उनकाे दाबी छ। यसैबीच इरानले अमेरिकी सेनाले प्रयोग गर्ने अखडालाई धम्की दिएको छ भने इरानका सर्वोच्च नेता अयातुल्लाह अली खामेनीका सल्लाहकारले ती अखडालाई ‘आफ्नो (इरानको) सशस्त्र बलको वैध निशाना’ मानिने बताए।

यद्यपि, अमेरिकी आक्रमणले तेहरानलाई द्वन्द्व कम गर्न वा यसलाई अझ फराकिलो बनाउन प्रेरित गर्छ कि गर्दैन त्यो भने हेर्न बाँकी नै छ। चीनले अमेरिकी आक्रमणको निन्दा गर्दै रुस र अरब राष्ट्रहरुको समूहलाई साथ दिँदै यसले मध्यपूर्वमा तनाव बढाएको बताएको छ। रासस