काठमाडौं (फागुन, १) - गैरआवासीय नेपाली संघका पूर्वअध्यक्ष भवन भट्ट निलम्बनमा रहेको बीबी एयरवेजको एओसी (एयर अपरेटर सर्टिफिकेट) ब्युँताउने दौडधुपमा लागेका छन्। 

स्थापनाको एक दशकसम्म जहाज उडान नसकेपनि लाइसेन्स कायमै राख्न सफल भएका भट्ट अहिले फेरि एओसी ब्युँताउन लागिपरेका छन्। भट्टको कम्पनी टीबीआई समूहका प्रतिनिधिहरू संस्कृति पर्यटन तथा नागरिक उड्डयन मन्त्रालय तथा नेपाल नागरिक उड्डयन प्राधिकरणमा धाउन थालेका छन्।

समूहका प्रतिनिधिमात्रै होइन स्वयम् भट्ट पनि एओसी ब्युँताउन सक्रिय भएर लागिपरेका छन्। 

अन्य सेवा तथा व्यापारबाट हात झिकिरहेका भट्टले एयरलाइन्स सञ्चालन गर्नका लागि भन्दै मन्त्रालयमा आग्रह गरेको अधिकारीहरूले बताएका छन्। 'उहाँहरु अहिले सेवा सञ्चालन गर्नका लागि भन्दै आउनु भएको छ' मन्त्रालय निकट स्रोतले भन्यो। 

बीबी एयरवेजले सबैभन्दा पहिला लाइसेन्समा फ्लिट (जहाज) को प्रकार परिवर्तन गर्न खोजेको छ। पहिले बोइङ ल्याएर अन्तर्राष्ट्रिय उडान सञ्चालन गर्ने भनिएको छ। अब यसलाई एयरबसका जहाज ल्याएर उडान गर्ने भनेर संसोधन गर्न खोजिएको छ। 

लाइसेन्समा संसोधन मात्र होइन जहाज खरिदका फ्लिट अनुमति, एओसी लगायतका अनुमतिका लागि भट्टले पहल गरेका छन्। 'राजनीतिक तहमा पनि दौडधुप चलिरहेकै छ होला। तर प्रशासनिक रुपमा पनि फाइल अघि बढेको छ' मन्त्रालयका एक अधिकारीले भने। 

बीबीको फ्लिट परिवर्तन तथा अनुमतिका लागि अहिले मन्त्रालयले नागरिक उड्डयन प्राधिकरणको राय माग गर्दै पत्राचार गरिसकेको छ। 

२०६८ सालमा स्थापना भएको बीबीले त्यसको एक वर्षपछि नै अन्तर्राष्ट्रिय उडान सुरू गरेको थियो। २०६९ भदौ २८ गते काठमाडौंबाट अन्तर्राष्ट्रिय उडान सुरु गरेको थियो। कम्बोडियाको टोन्ले साप एयरलाइन्ससँग एकथान 'बोइङ ७५७-२००' सिरिजको जहाज भाडामा लिएर उडान गरेपनि कात्तिकमै उडान बन्द गरेको थियो। तीन महिना पनि उडानमा टिक्न नसकेको बीबी एयरवेजको एओसी निलम्बनमा परेको थियो। 

एओसी निलम्बनमा परे पनि लाइसेन्स भने नवीकरण हुँदै आएको छ। लाइसेन्स पर्यटन मन्त्रालयले वितरण गर्छ। अहिले पनि बीबीको लाइसेन्स भ्यालिड रहेको मन्त्रालयले जानकारी दिएको छ।

बीबी एयरवेजले दुई वर्ष पहिले पनि उडान गर्ने र फ्लिट परिवर्तन गर्ने भन्दै मन्त्रालयमा आवेदन दिएको थियो। लाइसेन्स नवीकरण भएपछि बीबीले उडानका लागि व्यावसायिक योजना मन्त्रालयमा प्रस्तुत गर्दै आएको छ। २०७४ सालमा नेपाल एयरलाइन्सको पूरानो बोइङ जहाज किनेको बीबीले उडान गर्ने योजना बुझाएको थियो। तर त्यो जहाजबाट पनि बीबीले उडान गर्न सकेन।  

यो पटक पनि चारवटा एयरबसका न्यारोबडी जहाज ल्याएर अन्तर्राष्ट्रिय उडान गर्ने व्यावसायिक योजना बुझाएको छ। भारत लगायतका देशमा उडान सुरू गर्ने एयरलाइन्सको योजना रहेको छ। अन्तर्राष्ट्रिय साझेदारी तथा विदेशी लगानी पनि ल्याउने बीबीका तर्फबाट प्रतिबद्धता जाहेर भएको छ। 

नेपालबाट अन्तर्राष्ट्रिय उडान गर्ने दुईवटा घरेलु एयरलाइन्स छन्। चारवटा एयरलाइन्सले अनुमति लिएका छन्। यसमा बुद्ध एयरले सीमित गन्तव्यमा मात्र उडान गरिरहेको छ। श्री एयरलाइन्सले चार्टर्ड उडानको अनुमति मात्र पाएको छ। नेपाल एयरलाइन्स र हिमालयले उडान गरिरहेका छन्। 

अन्तर्राष्ट्रिय उडानको लाइसेन्स भएको बीबीले भने उडान अझैसम्म उडान गरेको छैन।