काठमाडौं- सेयरधनीलाई १०० प्रतिशत लाभांश दिएको हिमालयन डिष्टिलरीले चालु आर्थिक वर्षको पहिलो ६ महिनामा उत्कृष्ट नाफा गरेको छ। कम्पनीले पहिलो ६ महिनामा गतवर्ष भन्दा १६.३७ प्रतिशत बढी नाफा कमाएको हो। कम्पनीले ४६ करोड २७ लाख रुपैयाँ खुद नाफा कमाएको छ।
गतवर्ष कम्पनीले ३९ करोड ७६ लाख रुपैयाँ नाफा कमाएको थियो। कम्पनीको प्रतिसेयर आम्दानी ६०.९५ रुपैयाँ रहेको छ भने प्रतिसेयर नेटकवर्थ १४८.२ रुपैयाँ पुगेको छ।
कम्पनीले ७५ प्रतिशत सेयर र २५ प्रतिशन नगद गरी १०० प्रतिशत लाभांश दिएको छ। कम्पनीले अर्कोपटक पनि लाभांश राम्रै दिने गरी नाफा आर्जन गरेको छ। गत वर्ष ५० प्रतिशत सेयर र ५० प्रतिशन नगद गरी १०० प्रतिशत लाभांश दिएको थियो।
चालु आर्थिक वर्षको पहिलो त्रैमासिक अवधिमा पनि कम्पनीको प्रतिसेयर आम्दानी ९७ रुपैयाँ रहेको थियो। यस अवधिमा कम्पनीले २१ करोड २ लाख रुपैयाँ मुनाफा आर्जन गरेको थियो। कम्पनीको १ अर्ब ५१ करोड रुपैयाँ चुक्ता पुँजी रहेको छ।
कम्पनीको दोस्रो बजारमा बिहीबार प्रतिकित्ता ४६०० रुपैयाँमा कारोबार भएको थियो। बिहीबार मूल्य प्रतिकित्ता १५ रुपैयाँले घटेको थियो। समग्र बजार घटेकोले हिमालयनको पनि सेयर मूल्य घटेको हो।
कम्पनीको पछिल्लो ५२ हप्तामा अधिकतम ७९३८ रुपैयाँमा कारोबार भएको थियो भने न्यूनतम ३८७९ रुपैयाँमा कारोबार भएको थियो।
