काठमाडौं- सरकारले नवप्रवर्तनमा आधारित स्टार्टप व्यवसायलाई सहुलियतपूर्ण कर्जा उपलब्ध गराउने घोषणा गरेको छ।

आगामी आर्थिक वर्ष २०८२/८३ को बजेट प्रस्तुत गर्दै अर्थमन्त्री विष्णुप्रसाद पौडेलले स्टार्टप प्रवर्द्धनका लागि विशेष कार्यक्रम ल्याउने घोषणा गरेका छन्।

उनका अनुसार स्टार्टप व्यवसायलाई ३ प्रतिशत ब्याजदरमा सहुलियतपूर्ण कर्जा उपलब्ध गराइनेछ। उक्त कार्यक्रमका लागि सरकारबाट ७३ करोड रुपैयाँ बजेट विनियोजन गरिएको छ।

अर्थमन्त्री पौडेलले नवप्रवर्तनशील सोच राख्ने जेन-जी पुस्तालाई लक्षित गर्दै स्टार्टपहरूलाई प्राथमिकता दिइने स्पष्ट पारे। उनले उद्यमशीलता प्रवर्द्धन, रोजगारी सिर्जना र आर्थिक आत्मनिर्भरता प्राप्तिका लागि युवामुखी कार्यक्रमहरू आवश्यक रहेको उल्लेख गरे।