काठमाडौं- चालु आर्थिक वर्षको बजेटमा निर्वाचनका लागि मात्रै १० अर्ब बराबरको व्यवस्था भए पनि ४० अर्ब रूपैयाँ बराबरको माग आएको छ।
अर्थ मन्त्रालयमा बिहीबार आयोजित चालु आवको बजेटको अर्धवार्षिक मूल्याङ्कन प्रतिवेदन सार्वजनिक गर्दै अर्थमन्त्री जनार्दन शर्माले निर्वाचनका लागि ४० अर्ब रूपैयाँ बराबरको माग आएको जानकारी दिएका हुन्।
निर्वाचन राष्ट्रिय अभियान भएकाले त्यसका लागि साधन र स्रोत उपलब्ध गराउनु सरकारको दायित्व भए पनि आफूहरु चापमा रहेको उनको भनाइ छ। सरकारले आगामी वैशाख ३० गतेका लागि स्थानीय निकायको निर्वाचनको मिति घोषणा गरेको छ।
निर्वाचनका लागि बजेट व्यवस्थापन गर्न सरकार लागिपरेको जानकारी दिँदै अर्थमन्त्रीले बजेटको जोहो गरिने र निर्वाचन समयमै सम्पन्न गरिने बताए। रासस
