काठमाडौं- स्रोत नखुलेको ६९ लाख ९९ हजार रुपैयाँसहित एकजना पक्राउ परेका छन्।
काठमाडौं महानगरपालिका-१६ बालाजु बाइपासबाट स्रोत नखुलेको नगद ६९ लाख ९९ हजार रुपैयाँ सहित नुवाकोट ककनी गाउँपालिका-३ चाउथे घर भएका २९ वर्षीय नवराज ढुंगानालाई मंगलबार दिउँसो पक्राउ गरिएको प्रहरीले जनाएको छ।
प्रहरीका अनुसार विशेष सूचनाको आधारमा महानगरीय प्रहरी कार्यालय रानीपोखरी र महानगरीय प्रहरी वृत्त बालाजुबाट खटिएको प्रहरीले उनलाई उक्त नगदसहित फेला पारी पक्राउ गरेको हो।
यस सम्बन्धमा आवश्यक अनुसन्धान गरिरहेको प्रहरीले जनाएको छ।
