चितवन- चितवनको पर्यटकीय नगरी सौराहाका व्यवसायीले घुमौँ सौराहा अभियानलाई निरन्तरता दिएका छन्। आन्तरिक पर्यटन प्रबर्द्धनका लागि व्यवसायीले आजदेखि पश्चिम नेपाल केन्द्रित अभियानलाई निरन्तरता दिएका हुन्। ४ वर्षअघि पूर्वीनेपालबाट सुरु भएको अभियान केही समयका लागि स्थगित भएको थियो।

हाल स्थानीय सरकारसँगको समन्वयमा निरन्तरता दिइएको क्षेत्रीय होटल संघ चितवनका अध्यक्ष ओमप्रकास पाण्डेले जानकारी दिए। मुलुकको तेस्रो पर्यटकीय गन्तव्य सौराहासहित चितवनको पर्यटनलाई थप उचाइमा पुर्याउने उद्देश्यले अभियान सुरु गरिएको उनको भनाइ छ।

स्थानीय सरकारको रूपमा रहेको रत्ननगर नगरपालिका, रत्ननगर पर्यटन प्रबद्र्धन समिति, क्षेत्रीय होटल संघ चितवनसहित पर्यटनसँग सम्बन्धित विभिन्न संघसंस्थाको सहकार्यमा अभियानलाई निरन्तरता दिइएको उनले बताए। ‘चितवन भित्रिने पर्यटकको सङ्ख्या दोब्बर बनाउने उद्देश्यका साथ दोस्रो पटक सुरु गरिएको अभियान लिएर पश्चिम नेपालको यात्रामा निस्किएका छौँ’ अध्यक्ष पाण्डे भन्छन्, ‘अभियानले पर्यटन क्षेत्र थप चलायमान बन्नेछ।’

अभियानमा निस्किएका जनप्रतिनिधि, व्यवसायी तथा संरक्षणकर्मीको टोलीलाई रत्ननगर नगरपालिकाका उपमेयर यादवप्रसाद पाठक र प्रमुख प्रशासकीय अधिकृत सुकदेव लम्सालले बिदाइ गरेका छन्। पश्चिम नेपालका ३ वटा प्रदेशका मुख्य सहरमा पुगेर सरकार प्रमुखसहित जनप्रतिनिधि, व्यवसायीसँग अन्तरक्रिया गरी सौराहा आउन पर्यटकलाई आह्वान गर्ने योजना छ।

व्यवसायीको समूह लुम्बिनी, कर्णाली र सुदुरपश्चिम प्रदेशका प्रमुख सहर तथा पर्यटकीय स्थलमा पुग्ने जनाइएको छ। लुम्बिनी प्रदेशको नेपालगञ्ज, भैरहवा र बर्दिया, कर्णाली प्रदेशको सुर्खेत र सुदुरपश्चिम प्रदेशको महेन्द्रनगर र कन्चनपुरमा पर्यटन प्रबर्द्धनसम्बन्धी अन्तरक्रिया तथा पत्रकार सम्मेलन गर्ने कार्यक्रम तय गरिएको छ।

घुमौँ सौराहा, चितवनमार्फत पर्यटकको सङ्ख्या दोब्बर बनाउने लक्ष्य लिएको संघका उपाध्यक्ष तथा घुमौँ सौराहाका संयोजक गुणराज थपलियाले बताउँछन्। रत्ननगर पर्यटन प्रबर्द्धन समितिका अध्यक्ष भेषराज दुवाडीले सौराहाको पर्यटनलाई ‘ब्राण्डिङ’ सुरु गरिएको जानकारी दिए। रासस