म्याग्दी- म्याग्दीको अन्नपूर्ण गाउँपालिका-१ दोबामा ‘एक घर, एक धारा’ सहितको खानेपानी आयोजना निर्माण भएको छ। गण्डकी प्रदेश सरकारको बजेटबाट खानेपानी जलस्रोत तथा सिचाई डिभिजन कार्यालय म्याग्दीले धारा निर्माण गरेको हो।

आर्थिक वर्ष २०७५/७६ देखि शुरु भएको योजना ७ वर्षमा सम्पन्न भएको हो। करिब ५ करोड रुपैयाँ लगानीमा ४ वटा योजनामा निर्माण भएका छने। जसबाट ४ सय २२ घरपरिवार लाभान्वित भएका कार्यालयका प्रमुख सिनियर डिभिजनल झलकमोहन ओझाले जानकारी दिए। पर्याप्त बजेट बिनियोजन नहुँदा योजना निर्माण गर्न ७ वर्ष लागेको हो।

उनका अनुसार चालु आर्थिक वर्षमा विनियोजन भएको २० लाख रुपैयाँ बाहेक गत आर्थिक वर्षसम्म उक्त योजना निर्माणमा ४ लाख ६७ लाख ९६ हजार रुपैयाँ खर्च भएको छ। गरेकखोला, चिसेपानी, गरिलाखोर र ओरालखर्कको मुहानको पानीलाई फरक-फरक ठाउँमा निर्माण भएका रिजर्भ ट्यांकीमा संकलन गरेर पाइपमार्फत घरघरमा वितरण गरिएको छ।

दोबा खानेपानी योजनाको उपभोक्ता समितिका अध्यक्ष यामबहादुर गर्बुजाका अनुसार मुहान, ट्यांकी र मुख्य पाइपको भौतिक संरचना निर्माणमा डिभिजन कार्यालयले सघाएको हो। यद्यपि शाखा पाइपलाईन खन्न श्रमदान गरेका उपभोक्ताले घरघरमा निजी धारा आफ्नै लगानीमा बनाएका हुन्।

योजनालाई व्यवस्थित र दीर्घकालिन रुपमा सञ्चालन गर्न प्रत्येक धारामा मिटर जडान गरेर न्युनतम शूल्क निर्धारण गरिएको उपभोक्ता समितिका पूर्व अध्यक्ष डमबहादुर पूर्जा बताउँछन्। अन्नपूर्ण-१ का वडा अध्यक्ष दिलीप गर्बुजाका अनुसार औल र मारका टोलका बासिन्दा र गाईबस्तुले प्रयोग गर्ने खानेपानीको मुहान यसअघि एउटै थियो। योजना निर्माण भएपछि स्थानयिले शुद्ध खानेपानी उपभोग गर्न पाएका छन्। 

स्थानीयबासी तालदेवी पुनले घरकै धारामा पानी आएपछि समयको बचत भएको र झञ्जट हटेको बताइन्। ‘पानी लिनका लागि मुहानमा जान, आउन लाग्ने समय र झञ्जट हटेको छ’ उनी भन्छिन्, ‘शुद्ध र सफा पानी भएपछि दुषित पानीका कारण हुने स्वास्थ्य समस्यामा पनि कमि आएको छ।’ रासस