खोटाङ- विपन्न महिलाको उत्थानका निम्ति खोटाङको केपिलासगढी गाउँपालिकामा ग्रामीण महिला नवउद्यम तथा अनुदान कार्यक्रम सञ्चालन भएको छ। गाउँपालिकाका कमजोर आर्थिक अवस्था भएका नागकिकको आयआर्जनमा वृद्धि गर्ने उद्देश्यले ‘जी फाउण्डेशन’को सहयोगमा उक्त कार्यक्रम सञ्चालन भएको हो।

कार्यक्रमअन्तर्गत अनुदानका लागि केपिलासगढी गाउँपालिका र जी फाउण्डेशनबीच सम्झौतासमेत भएको छ। फाउण्डेशनका सूचना अधिकारी अभिनी दीक्षितका अनुसार पहिलो चरणमा ११ महिला र ४ पुरुष गरी १५ जना छनोटमा परेका छन्।

छनोटमा परेका उद्यमीले कृषि उपज, सागसब्जीखेती र पशुपन्छी उत्पादनलगायत उद्यम गर्नुपर्ने छ। फाउण्डेशनले सन् २०२५ सेप्टेम्बरसम्म पालिकालाई प्राविधिक सहयोग गर्ने जनाइएको छ।

साथै फाउण्डेशनले नयाँ उद्यम दर्ता, कृषि तथा पशुपन्छीपालनका लागि बीउ, पुँजी, प्राविधिक सहयोग र परामर्श दिने उनको भनाइ छ। रासस