गण्डकी- ३ वर्षे ठेक्का अवधि सकिन ४ महिना बाँकी रहँदा पोखराको सेती नदीमा निर्माणाधीन ‘सिग्नेचर’ पुलको भौतिक प्रगति जम्मा ४४.६६ प्रशित मात्रै भएको छ। पोखरा-मुग्लिन सडकमा पर्ने उक्त पुलको ठेक्का अवधि आगामी भदौमा सकिँदै छ। २०७९ साउनमा निर्माण कम्पनी रसुवा कन्स्ट्रक्सनले पुल निर्माणको जिम्मा लिएको थियो।

पोखरा-मुग्लिन सडक आयोजनाको पश्चिम खण्ड (पोखरा-जामुने) का प्रमुख कृष्णबहादुर कुँवरले पुल बन्न अझै एक वर्ष लाग्ने बताए। ‘मापदण्डभित्रका संरचना हटाउन खोज्दा अवरोध आएकाले सुरुको चरणमा निर्माणले गति लिन सकेन, पुलको डिजाइन स्वीकृत हुन पनि समय लाग्यो’ उनले भने, ‘पुलका लागि चाहिने केबललगायत सामग्री विदेशबाट ल्याउनुपर्ने भएकाले काममा ढिलाइ भइरहेको हो।’

‘केबल-स्टेड’ प्रविधिको उक्त पुलमा ४ वटा जगको काम पूरा भएको छ। ३ वटा टावर निर्माण भइसकेको र एउटा निर्माणका क्रममा रहेको प्रमुख कुँवरले बताउँछन्। आकर्षक डिजाइनमा बन्ने उक्त ‘सिग्नेचर’ पुलको जग निर्माणमा बढी समय लागे पनि टावरलगायत माथिल्लो संरचनाको काम छिटो हुने निर्माण कम्पनीले जनाएको छ।

६ लेनको उक्त सडकका अहिले रहेको पुलको तल र माथि गरी आकर्षक बनावटका २ वटा ‘सिग्नेचर’ पुल बन्ने प्रमुख कुँवरले जानकारी दिए। एसियाली विकास बैंक (एडीबी)को ऋण सहयोगमा सडक विभागमार्फत उक्त पुल निर्माण भइरहेको हो। भ्याटबाहेक ९४ करोडको ठेक्कामा रसुवा कन्स्ट्रक्सनले पुल निर्माणको काम गर्दैछ।

‘सिग्नेचर’ पुल बनेपछि पर्यटकीय राजधानी पोखराको आकर्षण पनि बढ्ने छ। पुरानो प्रविधिको भन्दा अहिले बनाउन लागिएकाे पुल डिजाइनका हिसाबले आकर्षक छ। १ सय ९० मिटरको उक्त पुल निर्माणमा कंक्रिट र फलामको प्रयोग हुने प्रमुख कुँवरले बताए। पुल निर्माणभन्दा पहिला विदेशी प्राविधिकसहितको टोलीले पुलको डिजाइन गरेको थियो।

पोखरा-मुग्लिन सडक ४ लेनमा विस्तार तथा स्तरोन्नति आयोजनाअन्तर्गत पोखराको सेती र तनहुँको मादी नदीमा सिग्नेचर पुल निर्माणाधीन अवस्थामा छन्। ५० वर्षअघि बनेको पृथ्वी राजमार्गअन्तर्गतको पोखरा-मुग्लिन सडक २०७८ साल वैशाखदेखि विस्तार तथा स्तरोन्नतिको काम सुरु गरिएको थियो। निर्माणमा कुनै अवरोध नआएमा आगामी हिउँदसम्ममा सडक स्तरोन्नतिको काम सकिने आयोजना कार्यालयले जनाएको छ।

गण्डकी प्रदेशको ‘लाइफ लाइन’का रूपमा रहेको उक्त सडकको पूर्वी खण्ड (जामुने-मुग्लिन)मा हालसम्म भौतिक प्रगति ८२.९५ प्रतिशत र पश्चिम खण्ड (पोखरा-जामुने)मा ५०.३४ प्रतिशत पुगेको छ। कुल ४१.४५ किमी दूरीको पूर्वी खण्डमा ३ किमीमात्र कालोपत्र हुन बाँकी छ। कुल ३८.८८ किमी दूरीको पश्चिम खण्डमा हालसम्म ३५.५ किमी एकतर्फी (दुई लेन) सडक कालोपत्र भइसकेको प्रमुख कुँवरको भनाइ छ।

‘करिब ३ किमी सडक एकतर्फी कालोपत्र हुन बाँकी छ, १८ किमी दूरीमा २ तर्फ नै कालोपत्र भइसकेको छ’ आयोजना प्रमुख कुँवर भन्छन्, ‘आउँदो असारभित्रमा ३० किमी दूरीमा दुईतर्फी नै कालोपत्र सक्ने लक्ष्य छ।’ रासस