कास्की- पोखरा महानगरपालिका-४ र ५ जोड्ने फिर्केखोला पुल निर्माणको ठेक्का तोडिएको छ। सडक डिभिजन कार्यालय पोखराले सो पुल निर्माणका लागि २०७५ असोजमा ठेक्का सम्झौता गरेको थियो। 

तर, निर्माण कम्पनीले काम सम्पन्न नगरेको र काम गर्ने अग्रसरतासमेत नदेखाएपछि कार्यालयले ठेक्का तोडेको हो। पुल निर्माणको ठेक्का शान्ति-आरोग्य जेभी सानेपा ललितपुरले पाएको थियो। सडक डिभिजन कार्यालयले पटकपटक म्याद थप्दासमेत काम नगरेपछि ठेक्का तोडिएको डिभिजन कार्यालय पोखराका प्रमुख एवं सिनियर डिभिजनल इन्जिनियर (सीडीई) नबराज बाँस्तोलाले बताए।

‘पुल निर्माण गर्न पटकपटक म्याद थप गर्दा पनि काम सम्पन्न नभएको तथा कार्य सम्पन्न गर्न सक्ने प्रतिबद्धता र तदारूकता नदेखाइएकाले नियमानुसार ठेक्का सम्झौता अन्त्य गरिएको हो’ प्रमुख बाँस्तोला भन्छन्, ‘अब अर्थ मन्त्रालयबाट स्रोत सुनिश्चित भएपछि नयाँ ठेक्का प्रक्रिया सुरु हुन्छ।’

साथै सडक डिभिजन कार्यालयले सो पुल निर्माण कम्पनी शान्ति-आरोग्य जेभीलाई कालोसूचीमा राख्न सिफारिस गरेको छ। ‘सार्वजनिक खरिद ऐन, २०६३ दफा ५९ (८) र ठेक्का सम्झौताको प्राबधानबमोजिम कार्यसम्पादन, पेस्कि जमानत र धरौटीबापतको रकम जफत हुन्छ।

त्यस्तै पोखरा कार्यालय, प्रशासन, कोष तथा लेखा नियन्त्रक कार्यालय र निर्माण व्यवसायी वा निजको आधिकारिक प्रतिनिधिको रोहबरमा ८ देखि १५ दिनभित्र हालसम्म अद्यावधिक भएको काम र बाँकी कामको नापजाँच गरी मूल्यांकन गर्नेसमेत कार्यालय प्रमुख बाँस्तोलाले बताए।

पोखरा-बागलुङ राजमार्गअन्तर्गत पोखराको जिरो किमीबाट वन्ध्यवासिनीसम्मको ६ लेन सडकको बीचमा फिर्केखोलामाथि साँघुरो पुलका कारण दुर्घटना बढेको छ। जसका कारण नयाँ पुल निर्माण प्रक्रिया सुरु गरिएको हो। अहिले भइरहेको साँघुरो पुलको दायाँ-बायाँ ११ मिटर चौडाइ र ५०-५० मिटर लम्बाइका दुईवटा पुल निर्माणका लागि १७ करोड १० लाख रुपैयाँमा सडक डिभिजन कार्यालयले ठेक्का सम्झौता गरेको थियो।

सो पुल सम्झौताको ३० महिना अर्थात् २०७७ चैत ३० भित्रमा निर्माण सकिनुपर्ने भएपनि निर्माण कम्पनीले विभिन्न बहाना बनाउँदै आलटाल गर्दै आएको थियो। पुल निर्माण गर्न ३ पटकसम्म म्याद थप भइसकेको छ। सडकअनुसार फिर्केखोला पुल साँघुरो हुँदा धेरै दुर्घटना भइरहेका छन्। स्थानीयवासीले पनि पुलः निर्माण तोकिएको समयभित्रमा सम्पन्न गर्न जिल्ला प्रशासनलगायत कार्यालयमा दबाब दिँदै आएका थिए। रासस