काठमाडौं- भन्सार छलेर कपडा आयात गरेको अभियोगमा सात जनाविरुद्ध राजस्व अनुसन्धान विभागले मुद्दा दर्ता गराएको छ। 

प्रज्ञापनपत्र बिनाका कपडा ल्याएको पाइएपछि भन्सार तथा कर छली गरेको पाइएकाले उनीहरु विरुद्ध उच्च अदालत पाटन हेटौंडा इजलासमा मुद्दा दर्ता गरिएको विभागले जानकारी दिएको छ। 

अभि ट्रेडर्स कलैया ७ बाराको मिति २०७८/८/३ गतेको विजक नं. ७१ बमोजिमको प्लाष्टिकको दाना बोकेको ना ७ ख ७२५ नम्बरको ट्रकमा चालक बिशाल राईले विल विजक तथा प्रज्ञापण पत्र विनाको ३१ पोका कपडाहरु बीरगंजबाट लुकाई छिपाई काठमाण्डौंतर्फ ओसार पसार गरीरहेको अवस्थामा बरामद भएकोले भन्सार महसुल तथा मुल्य अभिवृद्धि कर छली गरेको पाइएको विभागले जानकारी दिएको छ। 

अभियुक्तहरुले भन्सार तथा भ्याट बापत ५८ लाख ७९ हजार ७४६ रुपैयाँ कर छली गरेकाले त्यति नै मात्राको जरिबाना तथा जेल सजाया माग गर्दै विभागले मुद्दा दर्ता गराएको हो।