गण्डकी- पोखरा महानगरपालिकाले महानगर क्षेत्रभित्र जै घाँस लगाउने किसानलाई सहयोग गर्ने भएको छ। यसका लागि महानगरपालिकाले १२ लाख ३९ हजार रूपैयाँ सहयोग गर्ने भएको छ।

महानगरपालिकाले किसानलाई पशुपालनतर्फ आकर्षित गरी घाँसखेती प्रवर्द्धन गर्ने उद्देश्यका साथ चार वर्षयता जै घाँस लगाउने किसानलाई सहयोग गर्दै आएको महानगरपालिकाका पशु सेवा शाखा प्रमुख डा अशेषराज विकले जानकारी दिए।

उनका अनुसार यसवर्ष कुल एक हजार ९४२.४ रोपनी क्षेत्रफलमा प्रतिरोपनी ६३८ रूपैयाँका दरले जै घाँसखेती लगाउने १७८ किसानलाई रकम प्रदान गरिने भएको छ।

यसअन्तर्गत बीउका लागि पाँच लाख ५९ हजार रूपैयाँ र खनजोतका लागि ६ लाख ७९ हजार रूपैयाँ विनियोजन गरिएको प्रमुख डा विकले बताए। रासस