काठमाडौं- घरजग्गा कारोबारमा गएको चैत महिनामा केही सुधार देखिएको छ। चालु आर्थिक वर्षको चैत महिनामा ४९ हजार ८ सय ३२ लिखत पास भएको छ। फागुन महिनामा स्थिर रहेको कारोबार चैतमा सुधारको संकेत देखिएको छ। 

फागुनमा देशभर ४६ हजार ६१ वटा घरजग्गा लिखत पास भएको थियो। गत माघमा ४६ हजार ६९ संख्यामा लिखत पास भएको थियो। गत पुसमा केही वृद्धि देखिको कारोबार माघ र फागुनमा स्थिर देखिएको थियो। देशभरका मालपोत कार्यालयहरूबाट पुसमा ४८ हजार १ सय ५६ लिखत पास भएको थियो।

भूमि व्यवस्थापन तथा अभिलेख विभागका अनुसार चैतमा केही सुधार देखिएको हो। चैतमा ४ अर्ब ३९ करोड रुपैयाँ राजस्व संकलन भएको छ। फागुनमा ४ अर्ब १२ करोड रुपैयाँ उठेको थियो। चालु आवमा सबैभन्दा धेरै राजस्व पुसमा ४ अर्ब ६३ करोड रुपैयाँ उठेको थियो।

बैंकहरूमा निक्षेप थुप्रिएर ब्याजदर सस्तो हुँदा पनि कर्जा जान सकेको छैन। ब्याजदर सस्तो हुँदा पनि घरजग्गाको मूल्य घटाएर किन्ने मुडमा लगानीकर्ता देखिँदा अझै पर्ख र हेरको अवस्था छ। जसका कारण घरजग्गा कारोबारमा अपेक्षाकृत सुधार हुन सकेको छैन।

विभागले गत साउनमा तीन अर्ब ८३ करोड ५० लाख रुपैयाँ, भदौमा तीन अर्ब नौ करोड रुपैयाँ, असोजमा तीन अर्ब आठ करोड १२ लाख रुपैयाँ, कात्तिकमा दुई अर्ब ७० करोड ४० लाख रुपैयाँ, मंसिरमा तीन अर्ब ८७ करोड रुपैयाँ, पुसमा चार अर्ब २५ करोड २२ लाख रुपैयाँ र माघमा तीन अर्ब ८७ करोड २४ लाख रुपैयाँ राजस्व संकलन गरेको थियो।