काठमाडौं- भारतले बंगलादेशलाई निर्यात गर्नका लागि आफ्ना भूमि प्रयोग गर्ने ट्रान्ससिपमेन्ट सुविधा रद्द गरेको छ। 

चालु आर्थिक वर्षको आठ महिनासम्म नेपालले बंगलादेशबाट तीन अर्ब रुपैयाँबराबरको वस्तु आयात गरि ४४ करोड रुपैयाँ बराबरको वस्तु बंगलादेश निर्यात गरेको छ। नेपालले आलु, मकै, बिस्कुट, गार्मेन्ट, जुस, ससेज, दालमोठ जस्ता वस्तुहरू बंगलादेशबाट आयात गरेको थियो। 

बंगलादेशबारेको उक्त निर्णयले भारतको भूभाग हुँदै नेपाल वा भुटान जाने बंगलादेशका निर्यातमा कुनै प्रभाव नपर्ने भारतीय विदेश मन्त्रालयका प्रवक्ता रणधिर जैसवालले बताएका छन्। 

सन् २०२० को जुन महिनामा भारतले बंगलादेशलाई आफ्नो भूमि सीमाहरू हुँदै तेस्रो मुलुकहरूमा निर्यात गर्न ट्रान्ससिपमेन्ट सुविधा प्रदान गरेको थियो। यस सुविधाले बंगलादेशी निर्यातकर्ताहरूलाई भारतीय भूमि हुँदै भारतीय बन्दरगाहहरू वा विमानस्थलहरूमा सामान पठाउन अनुमति दिएको थियो। जसले ढुवानी समय र लागतमा कमी ल्याएको थियो।​

भारतीय केन्द्रीय अप्रत्यक्ष कर र सीमा शुल्क बोर्ड (सीबीआईसी) ले २०२५ अप्रिल ८ मा जारी गरेको नयाँ परिपत्रअनुसार  २०२० को उक्त परिपत्रलाई तत्काल प्रभावबाट रद्द गरिदिएको छ। यस निर्णयसँगै, बंगलादेशी निर्यातकर्ताहरूले अब भारतीय भूमि प्रयोग गरी तेस्रो मुलुकहरूमा सामान पठाउन सक्ने छैनन्। ​