काठमाडौं- लामो समयदेखि विन नेपाल लघुवित्त वित्तीय संस्थाको सेयर दोस्रो बजारमा निरन्तर उकालो लागेर हरेक दिन रेकर्ड बनाइरहेको छ।
नेपाल सेवा लघुवित्त र विन नेपाल लघुवित्त मर्जरपछि कारोबार खुला भएसँगै हरेक दिन सर्किट लागिरहेको छ। संयुक्त कारोबार सुरु भएको दिनदेखि नै सर्किट लागेको कम्पनीको लगातार पछिल्लो ९ दिन १० प्रतिशतले सेयर मूल्य बढेको छ।
एकीकृत कारोबारपछि प्रतिकित्ता ८४७ रुपैयाँ रहेको थियो। कम्पनीको पहिलो दिन भने १० प्रतिशत बढेको थिएन। त्यसयता ९ दिन १० प्रतिशतले बढेको छ।
कम्पनीको १० दिनमा १५ हजार ९ सय ७२ कित्ता कारोबार भएको छ। बिहीबारसम्म कम्पनीको २ करोड ६८ लाख ६५ हजार २ सय ६५ रुपैयाँ ६० पैसाको खरिदबिक्री समेत भएको छ। कम्पनीको सेयर मूल्य १० दिनमा ८४७ रुपैयाँबाट बिहिबार अन्तिम कारोबार १९५९ रुपैयाँमा भएको थियो।
विन नेपाल लघुवित्तको चुक्ता पुँजी ७ करोड २४ लाख रहेको छ भने बजार पुँजीकरण १४ अर्ब ९३ करोड ६७ लाख रुपैयाँ पुगेको छ।
