काठमाडौं- नागढुंगा सुरूङमार्ग निर्माणको काम अन्तिम चरणमा पुग्दा स्थानीय बासिन्दाको अवरोधका कारण दसैँअघि पनि सञ्चालनमा नआउने देखिएको छ।

आयोजना निर्माणमा स्थानीयले दुई सातादेखि अवरोध जारी राखेपछि असार मसान्तसम्मको समय सीमामा मात्रै नभएर आउने दसैँसम्म पनि सञ्चालनमा नआउने देखिएको छ। गत वर्ष नै सुरुङ 'ब्रेकथ्रु' भइसकेको आयोजनामा स्थानीयले विभिन्न माग राखेर पटक-पटक अवरोध गर्दै आएका छन्। 

सुरुङ 'ब्रेक थ्रु' हुँदा २०८२ बैशाखमा सञ्चालनमा ल्याउने घोषणा गरिएको थियो। तर सम्भव नहुने देखिएपछि सञ्चालनको मिति असार मसान्तसम्म पुर्‍याइएको थियो। निर्माण सम्पन्न गर्ने समय असोजसम्म थप भएपनि आयोजनाले असारमै सम्पन्न गर्ने जनाउ दिएको थियो। दसैँअघि जसरी पनि सुरुङ मार्ग सञ्चालनमा ल्याउने तयारीमा ठेस लाग्ने देखिएको छ।

अवरोधका कारण आउने असोजमा पनि सम्पन्न नहुने खतरा बढेको आयोजना प्रमुख सञ्जय पन्थीले बताए। उनका अनुसार काम सुरु भएपछि हालसम्म ८/१० पटकसम्म काम रोक्नुपरेको बताउँदै समाधान खोज्न पटक-पटक सम्झौता भएपनि स्थानीयले पटकैपिच्छे माग फेर्ने गरेको बताउँछन्।

आयोजनाको पश्चिमतर्फ (धादिङ) तर्फका स्थानीयले विभिन्न माग राखेर काममा अवरोध गरेकाले चैत ३ पछि कुनै काम हुन नसकेको आयोजनाले बताएको छ। आयोजनामा अवरोध हुँदा दिनदिनै दायित्व बढ्‌दै गएर निर्माण कम्पनीले क्षतिपूर्ति दिनुपर्ने अवस्था आउन लागेकोसमेत आयोजनाको भनाइ छ।

सडक विभागले भौतिक पूर्वाधार तथा यातायात मन्त्रालयमार्फत प्रहरी बल थप गराएर भएपनि आयोजनाको अवरोध हटाउन पहल गरेको छ।

आयोजना साइटमा १५ जापानीसहित ३०० जनाले काम गरिरहेका छन्। आयोजनाको काम ८६.३६ प्रतिशत सम्पन्न भएको छ। आयोजनाको पूर्वतर्फको फ्लाइओभर, सुरूङभित्रको सडक बनाउनेलगायत काम पनि अहिले रोकिएको छ। चन्द्रागिरि नगरपालिकाको बलम्बुदेखि धादिङको सिस्नेखोला जोड्ने नागढुंगा सुरूङमार्ग आयोजनाको मुख्य सुरूङको लम्बाइ २ हजार ६ सय ८८ मिटर छ।

आयोजनाको तीनवटा अन्डरपास, चारवटा बक्स कल्भर्ट, एउटा ओभरपास र तीनवटा पुल निर्माणको काम सकिएको छ। एउटा फ्लाइओभर निर्माणाधीन अवस्थामा छ। बाटो ढलान गर्नेलगायत पेभमेन्टका काम ६७ प्रतिशत सम्पन्न भएको छ। आयोजनाको ८६.३६ प्रतिशत भौतिक र ७६.६८ प्रतिशत वित्तीय प्रगति भएको छ।

२०७६ कात्तिकमा निर्माण थालिएको सुरुङको काम सम्झौताअनुसार ४२ महिनाभित्र सकिनुपर्ने थियो। कोरोना महामारी, स्थानीय विवाद तथा सुरूङ खन्ने क्रममा देखिएको प्राविधिक समस्यालगायत कारण आयोजना एक वर्ष पछि धकेलिएको थियो।

निर्माणको जिम्मा हाजमा एण्डो कर्पोरेसनले पाएको हो। लामो रस्साकस्सीपछि काठमाडौं जोड्न पहिलो सुरुङ मार्ग निर्माण भएपछि नागढुंगा उकालोमा हुने घण्टौँको ट्राफिक जामको समस्या हल हुने बताइएको छ।

सरकारले १६ अर्ब रुपैयाँ जाइकासँग ऋण लिएर बनाउन थालेको सुरुङ निर्माणमा कुल २२ अर्ब रुपैयाँ खर्च हुने छ। उक्त आयोजनामा उक्त ऋणबाहेक मुआब्जाका लागि सरकारले ६ अर्ब रुपैयाँ खर्चेको छ। सुरुङपछि मुख्य सडक साढे ७ किमि छोटिनेछ। सुरुङबाट ग्यास बुलेट, पेट्रोलियम पदार्थ बोकेका ट्यांकर र मोटरसाइकल चल्न पाउने छैनन्।