काठमाडौं- बीमा क्षेत्रको नियामक नेपाल बीमा प्राधिकरणका अध्यक्ष शरद ओझाको योग्यतामा प्रश्न उठाउँदै सर्वोच्च अदातलमा मुद्दा परेको छ। ओझाले प्रस्तुत गरेको योग्यता फर्जी रहेको भन्दै सर्वोच्च अदालतमा मुद्दा परेको हो।

न्यायाधीश नहकुल सुवेदीको इजलासमा ओझाविरुद्ध परेको रिटको सुनवाइ भइरहेको छ। अधिवक्ता इन्दिरा धमलाले ओझाविरुद्ध चैत १७ गते सर्वोच्चममा रिट दायर गरेकी हुन्।

पत्रकारितासँगै अध्यापन पेसामा रहेका ३२ वर्षीय ओझासँग बीमा प्राधिकरणको नियामक प्रमुख हुन आवश्यक योग्यता नरहेको भन्दै सर्वोच्च अदालतमा रिट परेको हो। 

उनले व्यवस्थापन विषयमा स्नातकोत्तर गरेपनि बीमा ऐन २०७९ अनुसार आवश्यक पर्ने योग्यता अनुभवका प्रमाणपत्रहरू फर्जी भएको जनाइएको छ। उनी आवद्ध सञ्चारमाध्यमबाट व्यवस्थापक तहमा रही काम गरेको अनुभवको प्रमाणपत्र नै शंकास्पद रहेको बताइन्छ। 

अध्यक्षका लागि बीमा ऐनमा बीमा, मौद्रिक, बैंकिङ, वित्तीय, वाणिज्यशास्त्र, व्यवस्थापन, तथ्यांकशास्त्र, गणित, अर्थशास्त्र वा कानून विषयमा कम्पनीमा स्नातकोत्तर वा सो सरहको उपाधि हासिल गरी सम्बन्धित क्षेत्रमा पाँच वर्षको उच्च व्यवस्थापकीय कार्य अनुभव हासिल गरेको हुनुपर्ने व्यवस्था रहेको छ। कानूनअनुसार ओझासँग शैक्षिक योग्यता भएपनि उच्च व्यवस्थापकीय तहमा कार्य गरेको अनुभव भने थिएन। 

उनले एक निजी कलेजमा व्यवस्थापन संकायअन्तर्गतको रणनीतिक व्यवस्थापन र संस्थागत व्यवहारलगायतका विषय अध्यापन गराउँदै आएका थिए। उनले केही समय अगाडिसम्म विशेष संवाददाताको रुपमा एक सञ्चारमाध्यममा काम गर्दै आएकोमा प्राधिकरणको नियुक्तिको चर्चासँगै व्यवस्थापकीय जिम्मेवारी दिएको भन्दै वेबसाइडमा पद परिवर्तन गरिएको थियो। 

कानून विषयमा स्नातक उत्तिर्ण गरी १ वर्षभन्दा कम समय वकालतको अनुभव उनीसँग छ। बीमा क्षेत्रमा उनको अनुभव बीमा एजेन्टकोरुपमा रहेको बताइन्छ। केही वर्ष अगाडि उनले प्रभु महालक्ष्मी लाइफ इस्योरेन्सबाट एजेन्टको इजाजत लिइ जीवन बीमाका पोलेसीहरू समेत बिक्री गरेको चर्चा हुने गरेको छ। 

त्यसैले उनीसँग बीमा पोलेसी बिक्री गरेकोबाहेक उनीसँग बीमा क्षेत्रसम्बन्धी उच्च व्यवस्थापक तहमा बसेर काम गरेको अनुभव देखिँदैन। यिनै विषयवस्तुलाई आधार बनाएर उनीविरुद्ध सर्वोच्चमा मुद्दा परेको बताइएको छ। 

प्रधानमन्त्री केपी शर्मा ओलीको मन्त्रिपरिषद बैठकले उनलाई प्राधिकरणको अध्यक्ष नियुक्त गरेको हो। अध्यक्षका लागि गठित सिफारिस समितिले ओझासहित पूर्वसचिव रामशरण पुडासैनी र स्वास्थ्य बीमा बोर्डका पूर्वअध्यक्ष दामोदर बसौलाको नाम पठाएपनि अनुभवको योग्यता नपुगेका ओझालाई प्राधिकरणको अध्यक्षमा नियुक्ति दिएको थियो।