काठमाडौं- भाटभटेनी सुपर मार्केट्सले गएको शुक्रबार राजावादी आन्दोलनका क्रममा आफ्नो स्टोरलाई तोडफोड र लुटपाटबाट जोगाउन खटिएका सुरक्षा गार्डसहित कर्मचारीहरूलाई सम्मान गरेको छ।

बुधबार एक कार्यक्रमबीच भाटभटेनी सपुरमार्केट्सका अध्यक्ष मिनबहादुर गुरुङले सुरक्षा गार्डलाई पाँच लाख रुपैयाँसहित सम्मान गरेका हुन्। 

गएको शुक्रबार राजावादी आन्दोलनकर्ताको प्रदर्शनका क्रममा अनियन्त्रित भिडले कोटेश्वरस्थित भाटभटेनी सुपरस्टोरमा तोडफोड र लुटपाट गर्दा आफ्नो कर्तव्य निर्वाह गर्दै अग्रपंक्तिमा खटिएका कर्मचारीलाई सम्मान गरिएको भाटभटेनीले जनाएको छ।

साथै व्यापार व्यवसायलाई निरन्तरता दिन रातभर मर्मत सम्भारको कार्यमा खटिएका कर्मचारीहरुलाई समेत सम्मान गरिएको भाटभटेनीले जनाएको छ। 

राजतन्त्रवादीहरूको आन्दोलनका क्रममा आन्दोलनकारीले गरेको तोडफोड र चोरीबाट कोटेश्वरको भाटभटेनी सुपरमार्केटमा ८० लाख रुपैयाँ बराबरको क्षति भएको छ। कम्पनीले बीमा दाबी प्रायोजनका लागि गरेको मूल्यांकनबाट ८० लाख ३३ हजार १९२ रुपैयाँ बराबरको क्षति भएको पाइएको हो।