काठमाडौं- राष्ट्रिय प्रसारण ग्रिड कम्पनी लिमिटेड (आरपीजीसीएल) को प्रमुख कार्यकारी अधिकृत (सीईओ) मा इञ्जिनियर सागर श्रेष्ठ नियुक्त भएका छन्।

नेपाल विद्युत प्राधिकरणको अनबन्डलिङ नीतिअन्तर्गत गठन गरिएको ग्रिड कम्पनीमा श्रेष्ठ नियुक्त भएका हुन्। उनलाई ४ वर्षको कार्यकालका लागि नियुक्त गरिएको हो। सात जना उम्मेदवारमध्ये अन्तिम प्रस्तुति तथा अन्तर्वार्ताबाट उनी छनोट भएका हुन्।

इञ्जिनियर श्रेष्ठ ऊर्जा क्षेत्रका अनुभवि व्यक्ति हुन्। उनले भारतको प्रतिष्ठित आईआईटी रुरकीबाट स्नातकोत्तर गरेका छन्।

हाल ग्रिड कम्पनीले करिब ११० अर्ब रुपैयाँ बराबरको ११ वटा परियोजनाहरूमा काम गरिरहेको छ। कम्पनीले नेपालको विद्युत प्रसारण प्रणालीलाई व्यवस्थित, भरपर्दो तथा प्रभावकारी बनाउन महत्वपूर्ण भूमिका खेल्दै आएको छ। इञ्जिनियर श्रेष्ठको नेतृत्वमा कम्पनीले विकास भइरहेका परियोजनाहरूलाई सफलतापूर्वक अगाडि बढाउने अपेक्षा गरिएको छ।

उनले नेपाल इञ्जिनियरिङ परिषद्को सञ्चालक समिति सदस्यको रूपमा सेवा गरिरहेका छन् भने नेपाल इञ्जिनियर्स संघका कार्यसमिति सदस्य हुन्। उनी काभ्रेपलाञ्चोकको नमोबुद्ध नगरपालिका-७ दाप्चा निवासी हुन्।