झापा- चालु आर्थिक वर्षको आठ महिनामा काँकडभिट्टाबाट १२ अर्ब ७४ करोड १६ लाख रूपैयाँ मूल्य बराबरको पेट्रोलिय पदार्थ आयात भएको छ।

गत आवको आठ महिनाको तुलनामा चालु आवको सोही अवधिमा ६४ करोड १७ लाख ५९ हजारले पेट्रोलियम पदार्थको आयातमा कमी आएको छ।

गत आवको आठ महिनामा १३ अर्ब ३८ करोड ३३ लाख रूपैयाँको पेट्रोलियम पदार्थ आयात भएको थियो। मेची भन्सार कार्यालयका सूचना अधिकारी ईश्वरकुमार हुमागाईँले पेट्रोलियम पदार्थको आयात घटे पनि राजस्व बढेको बताए।

चालु आवका आठ महिनामा पेट्रोलिय पदार्थको आयातबाट ६ अर्ब १२ करोड ४२ लाख रूपैयाँ राजस्व संकलन भएको छ। यो गत आवको सोही अवधिको तुलनामा पाँच दशमलव ६ प्रतिशतले बढी हो।

गत आवको आठ महिनामा पाँच अर्ब ८० करोड १८ लाख रूपैयाँ राजस्व संकलन भएको थियो। रासस