काठमाडौं- मलद्वारभित्र झण्डै एक करोड रूपैयाँको सुन लुकाएर ल्याउँदै गरेको अवस्थामा प्रहरीले तीन जनालाई त्रिभुवन अन्तर्राष्ट्रिय विमानस्थलबाट पक्राउ गरेको छ। प्रहरीले उनीहरुबाट १ किलो १ सय ५५ ग्राम सुन तथा चार आइफोन बरामद गरेको छ।
त्रिभुवन अन्तर्राष्ट्रिय विमानस्थल सुरक्षा कार्यालयका प्रमुख प्रहरी वरिष्ठ उपरीक्षक भीमप्रसाद ढकालका अनुसार पक्राउ पर्नेमा रौतहटको गौर नगरपालिका-१० का ३२ वर्षीय सुनिलकुमार साह, मकवानपुर मनहरिका २८ वर्षीय नवराज परियार र सिन्धुपाल्चोकको भोटेकोसी गाउँपलिका-३ का दावाछिरिङ शेर्पा छन्।
उनीहरुमध्ये शेर्पाले सुन मलद्धारभित्र लुकाएर ल्याएका थिए। तौलिँदा उक्त सुन १ किलो ५५ ग्राम रहेको फेला परेको छ। उनी एयर अरेवियामार्फत सारजहाँ विमानस्थलबाट नेपाल आएका थिए।
तीनै जनालाई बुधबार अपराह्न पक्राउ गरेको भए पनि आवश्यक अनुसन्धान र कानूनी प्रक्रिया पूरा गरी आज सार्वजनिक गरिएको हो।
साह र परियार दुबईबाट हिमालयन एयरमार्फत नेपाल आएका थिए। साहबाट चार थान आइफोन तथा ५० ग्रामको सुनको औँठी र सिक्री बरामद गरिएको छ। यस्तै परियारबाट आइफोन एक थान र सुनको बेरुवा औँठी दुई थान बरामद गरिएको छ। तीनै जनालाई बरामद सामग्रीसहित त्रिभुवन अन्तर्राष्ट्रिय विमानस्थल भन्सार कार्यालयलाई बुझाइएको छ। रासस
