काठमाडौं- चन्द्रागिरिमा भालेश्वर मन्दिरको दर्शनका लागि जाने पैदलयात्रु र जंगल प्रवेश गर्ने पर्यटकसँग एक सय रुपैयाँ शुल्क लिइएको विषयमा सामाजिक सञ्जालमा विरोध भएपछि चन्द्रागिरि हिल्स लिमिटेडले सूचना जारी गर्दै स्पष्टीकरण दिएको छ। 

स्थानीय सरकार र अन्य निकायसँगको छलफल तथा समन्वय एवं लिखित र मौखिक निर्णयका आधारमा नै शुल्क लिइएको चन्द्रागिरि हिल्सले जनाएको छ। 

'सो क्षेत्र वरिपरको फोहोर मैला व्यवस्थापन तथा सरसफाइ, शौचालयको व्यवस्थापन, निःशुल्क पिउने पानीको व्यवस्था, निःशुल्क वाइफाइ, बिजुली बत्ती, पार्किङ सुविधा र दर्शनार्थीहरूको व्यक्तिगत सुरक्षा तथा वनजन्य सुरक्षाका लागि दुई जना सुरक्षा गार्ड परिचालन गरी आवश्यक व्यवस्थापन गर्दै आइरहेको छ' चन्द्रागिरि हिल्सले सार्वजनिक सूचनामार्फत भनेको छ।  

सुक्खायाममा सम्भावित डढेलोको जोखिम न्यूनीकरण गर्न स्थानीय सामुदायिक वनहरूसँगको समन्वयमा चार जना वन हेरालु राख्नको निमित्त आर्थिक सहायतासमेत प्रदान गर्दै आइरहेको जनाउँदै चन्द्रागिरि हिल्सले भनेको छ, 'चन्द्रागिरि नगरपालिका, थाहा नगरपालिका र इन्द्रसरोवर गाउँपालिकाका स्थानीय बासिन्दाबाहेकका अन्य स्थानबाट वैकल्पिक मार्ग प्रयोग गरी आउने पर्यटक तथा दर्शनार्थीहरूबाट एक सय रुपैयाँ सेवा शुल्क लिइ सुविधा उपलब्ध गराउने प्रबन्ध गरिएको हो। सोको जानकारी चेकपोष्ट स्थित सूचना बोर्डमा समेत स्पष्ट बुझिने गरी उल्लेख गरिएको छ।'

उक्त व्यवस्थाबाट वैकल्पिक मार्ग हुँदै आउने पर्यटक तथा दर्शनार्थीहरूलाई थप सहयोग एवं सुविधा उपलब्ध भइरहेको चन्द्रागिरि हिल्सको भनाइ छ। 

सार्वजनिक कम्पनीको रूपमा सञ्चालनमा रहेको चन्द्रागिरि हिल्स लिमिटेडले नेपालको पर्यटन प्रवर्द्धनमा महत्वपूर्ण भूमिका खेल्दै आएको उल्लेख गरेको छ।