त्रिवेणी- नवलपरासी (बर्दघाट सुस्तापूर्व) नवलपुरको कावासोती-१५, मा रहेको थारू संग्रहालय पर्यटकीय केन्द्र बन्दै गएको छ।

आदिवासी तथा थारू समुदायले प्रयोग गर्ने सामग्री तथा वेशभूषा अवलोकनका लागि यहाँ आन्तरिक तथा बाह्य पर्यटक आउने गरेको संग्रहालय व्यवस्थापन समितिका अध्यक्ष इनरप्रसाद महतोले बताए।

अमलटारी घरबास नजिकै रहेको थारू संग्रहालयमा यहाँका थारू, बोटे, माझी, मुसहर समुदायले परापूर्वकालदेखि प्रयोग गर्दै आएका विभिन्न सामग्री तथा वेशभूषा झल्किने सामग्री राखिएका छन्। यी समुदायले विगतमा प्रयोग गरेको कतिपय सामग्री लोप भइसकेका छन्, त्यस्ता सामग्रीसमेत संग्रहालयमा राखिएका छन्।

आदिवासी थारू जातिका कलासंस्कृति झल्कने वेशभूषा, गरगहना, उनीहरूले प्रयोग गर्ने विभिन्न कृषि उपकरण पनि यहाँ सङ्ग्रह गरिएका छन्। यस्तै, चाँदीका गहना, पैसा, काठका चप्पल, माटाका भाँडा, ढकिया, गुन्द्री, जोत्न र खन्नलाई प्रयोग गरिने औजारसहितका सामाग्री संग्रहालयमा रहेको अध्यक्ष महतोले बताए।

चितवन राष्ट्रिय निकुञ्जको मध्यवर्ती क्षेत्रसमेत भएकाले यहाँ वन्यजन्तु अवलोकनका लागि आउने पर्यटक पनि संग्रहालय अवलोकनका लागि आउने गरेका छन्।

थारू, माझी, मुसहर, बोटे समुदायको संस्कृति तथा परम्परा बुझ्न संग्रहालयले सहयोग पुग्ने हुँदा यसमा रुचि हुनेहरू अवलोकनका लागि आउने गरेको समितिका अध्यक्ष महतोले बताए। 'यहाँ आएपछि थारू समुदायका रहनसहन कस्तो हुन्छ, पहिरन के हुन्छन्, घरमा के कस्ता सामग्री हुन्छन्, सबै अवलोकन गर्न पाइन्छ, यस कारण पर्यटक यहाँ आउने क्रम बढेको छ', उनले भने।

विसं २०६६ मा चन्दा संकलन गरी स्थापना गरिएको संग्रहालय लामो समयसम्म ओझेलमा परेको थियो। यहाँ घरबास स्थापना भएपछि पर्यटकीय गतिविधिमा वृद्धि हुँदा आदिवासी थारू संग्रहालयमा अवलोकनमा सहयोग पुगेको छ।

सुरुमा यहाँ निःशुल्क प्रवेशको व्यवस्था थियो। पछिल्लो ६ महिनादेखि स्वदेशी पर्यटकका लागि प्रतिव्यक्ति २५ रूपैयाँ र विदेशीका लागि प्रतिव्यक्ति १०० रूपैयाँ शुल्क लिने गरिएको छ। संग्रहालयको व्यवस्थापनका लागि शुल्क लिने गरिएको समितिले जनाएको छ। 

शुल्क लिन थालेपछि यहाँ अवलोकनका लागि आउने पर्यटकको अभिलेख राख्न सहज भएको समितिका अध्यक्ष महतोले बताए। शुल्क लिन थालेको छ महिनाको अवधिमा स्वदेशी तथा विदेशी गरी करिब चार हजार जनाले संग्रहालय अवलोकन गरेको अभिलेख छ।

गाउँमा प्रयोगमा नआएका सामग्रीलाई त्यसै फाल्नुभन्दा संग्रहालयमा उपलब्ध गराउन गाउँका बासिन्दालाई आग्रह गरेर सामग्री संकलन गरिएको हो। केही सामान भने खरिद गरिएको र केही आफै निर्माण गरेर राखिएको महतोले जानकारी दिए।

संग्रहालयले यहाँको पर्यटकीय गतिविधिमा टेवा पुगेको नवलपुर पर्यटन समितिका अध्यक्ष फन्सराम महतोले बताए। अमलटारी क्षेत्रमा आउँदा वन्यजन्तु अवलोकन मात्र नभएर यहाँका आदिवासीको रहनसहन, कलासंस्कृतिको समेत अवलोकन गर्न सकिने उनले बताए। रासस