काठमाडौं- तीनकुनेमा निर्माण हुने तीन सय शय्याको 'काठमाडौं इन्टरनेशनल अस्पताल' उद्योग विभागमा दर्ता भएको छ। ५ अर्ब ९३ करोड ४६ लाख रूपैयाँको लगानी प्रतिबद्धतासँगै अस्पताल उद्योग विभागमा दर्ता भएको हो।

दर्ता अभिलेखमा अस्पतालमा ४ सय ६३ जनाले रोजगारी पाउने उल्लेख छ। अस्पताल सञ्चालनमा आएपछि वार्षिक ३ लाख २८ हजारभन्दा बढीलाई ओपीडी र आईपीडी सेवा दिने दर्ता विवरणमा उल्लेख छ।

यसैगरी २९ हजारभन्दा बढीले अपरेसनको सेवा पाउनेसमेत विवरणमा उल्लेख छ। अस्पताल निर्माणका लागि भन्दै २०७९ चैतमा वातावरणीय प्रभाव मूल्यांकन रिपोर्ट राय सुझावका लागि सार्वजनिक गरिएको छ।

अहिले वातावरणीय प्रभाव मूल्यांकन रिपोर्ट पास भइसकेको छ। रिपोर्टमा पनि अस्पताल निर्माणमा ५ अर्ब ९३ करोड रुपैयाँ नै लागत अनुमान गरिएको थियो। रिपोर्टमा भवन बेसमेन्टसहित सात तलाको निर्माण हुने उल्लेख छ। अस्पतालमा १ सय ५० वटा चारपांग्रे र २ सय वटा दुईपांग्रे सवारी पार्किङ क्षमता रहने छ।

अस्पतालबाट ओपीडी सेवा वर्ष दिनमा ३ सय दिन र आपतकालीन सेवा ३ सय ६५ दिन नै सञ्चालन हुने छ। अस्पतालले भूमिगत पानीदेखि काठमाडौं उपत्याका खानेपानीले वितरण गरेको पानी प्रयोग गर्नेछ।

अस्पताल निर्माणका लागि गरिएको लगानी करिब ८ वर्षमा उठ्ने छ। १२.४३ रोपनी जग्गामध्ये २४ सय ६८ वर्गमिटरमा अस्पतालको संरचना निर्माण हुनेछ। भवनको उचाइ ३७.७० मिटर हुनेछ।