काठमाडौं- सेयर बजार मंगलबारको कारोबारमा सुरुमा घटेर उतारचढाव भए पनि चुनाव हुने पक्का भएपछि फर्किएको छ। बजार मंगलबार दोहोरो अंकले बढेको छ।
मंगलबार १९.२६ अंकले बढेर बजार २८९१.३० बिन्दुमा पुगेको हो। मंगलबार ६ अर्ब ५७ करोड रूपैयाँको कारोबार भएको छ। जसमा १४८ कम्पनीको सेयर मूल्य बढेको छ, ३६ कम्पनीको घटेको छ भने ६ कम्पनीको मूल्यमा परिवर्तन भएको छैन।
आइतबार १०५.५५ अंकले बढेको बजारमा सोमबार भने १४.४८ अंकले करेक्सन आएको थियो। मंगलबार २९७५.७४ बिन्दुबाट कारोबार सुरु भएको थियो।
बजार खुल्नेवित्तिकै दोहोरो अंकले घटेर २८५७.९५ बिन्दुमा ओर्लिएको थियो। पौने १ बज्दा बजार बढेर २८८१.३५ बिन्दुमा पुगेको थियो। सोही समय एकाएक चुनावी चर्चा आएसँगै लगानीकर्ता उत्साहित देखिए। जसका कारण मंगलबार बजार बन्द हुने समयमा उकालो लागेको हो।
चुनावी वर्षमा सेयर लगानीकर्ता उत्साहित भएर लगानी गर्ने भएकोले अपवादबाहेक बढ्ने गरेको सेयर विश्लेषक छोटेलाल रौनियार बताउँछन्। ‘आजको प्रधानमन्त्रीको समाचारले समेत सेयर बजारलाई साथ दिएकोले केही समयमै नेप्से उच्च अंकमा जाने देखिन्छ,’ रौनियारले भने। प्रधानमन्त्री शेरबहादुर देउवाले मंगलबार नै निर्वाचन आयोगसँग निर्वाचन गरिने मिति तोक्ने विषयमा छलफल गर्दै छन्।
यसअघि पुस ५ गतेदेखि यता ५६२ अंकले बढेको बजारमा गएको साता आइतबारदेखि बिहीबारसम्मको कारोबारमा १५१.३२ अंकले गिरावट आएको थियो। तर यो साता आइतबारको बजारले भने सकारात्मक संकेत गर्दै वृद्धिमा सहयोग गरेको थियो। सोमबार करेक्सन आए पनि मंगलबार बजार पुन: फर्किएको छ।
गएको साता बजारमा गिरावट आइरहँदा पनि विश्लेषकहरूले मौसमी परिवर्तन देखिएको र बजार घट्ने ठाउँ नरहेको बताइरहेका थिए। अहिले देखिएको वृद्धिले समेत सेयर बजारमा अहिले सबै सूचकहरू राम्रो हुँदै गएकोले २२ अर्ब कारोबार र ३२०० अंकलाई उछिनेर माथि जाने देखिएको विश्लेषकको भनाइ छ।
