काठमाडौं- नेपाल विद्युत् प्राधिकरणले काठमाडौंको सतुंगलगायतका क्षेत्रमा आज बिजुली कटौती गर्ने भएको छ।
प्राधिकरणले सूचना प्रकाशित गर्दै बलम्बु फिडरअन्तर्गत पर्ने कञ्चन गेट, बोसीगाउँ, वौथली, सतुंगल चोकलगायतका क्षेत्रमा कन्डक्टरको क्षमता अभिवृद्धिलगायतका कार्यका लागि बिजुली कटौती हुने जनाएको हो।
आज बिहान ११ बजेदेखि अपराह्न चार बजेसम्म ती स्थानमा बिजुली काटिने भएकाले ग्राहकमा पर्न गएको असुविधाप्रति प्राधिकरणले क्षमा समेत मागेको छ। तोकिएको कार्य समयअगावै पूरा भएमा निर्धारित अवधिअगावै बिजुली प्रवाह हुने सूचनामा उल्लेख छ।
यस्तै, मूलपानी सबस्टेसन निर्माण आयोजनाले पनि आज बेलुकीसम्म नै बानेश्वर वितरण केन्द्र, महाराजगञ्ज वितरण केन्द्र, रत्नपार्क, जोरपाटी, बालाजु र कुलेश्वर वितरण केन्द्रलगायतका क्षेत्रमा बिजुली प्रवाह रोकिने जनाएको छ।
निर्माणाधिन सबस्टेसनमा प्राविधिक कामका लागि ती वितरण केन्द्रहरुमा बिजुली आप्रवाह आज साँझसम्म रोकिने प्राधिकरणले सूचित गरेको छ। रासस