काठमाडाैं- बीमा समितिले ११ वटा बीमा कम्पनीहरुलाई कारबाही गरेको छ। आर्थिक वर्ष २०७६/७७ को लेखापरीक्षण प्रतिवेदन तयार नपार्ने ११ बीमा कम्पनीहरुलाई कारबाही गरेको हो। प्रत्येक कम्पनीलाई १० हजार रुपैयाँका दरले जरीवाना गर्ने निर्णय समितिले गरेको छ।

समितिले दि ओरियण्टल इन्स्योरेन्स, नेशनल इन्स्योरेन्स, राष्ट्रिय बीमा कम्पनी, राष्ट्रिय बीमा संस्थान, नेपाल लाइफ इन्स्योरेनस, गुराँस लाइफ इन्स्योरेन्स, आइएमइ लाइफ इन्स्योरेन्स, युनियन लाइफ इन्स्योरेन्स, सन नेपाल लाइफ इन्स्योरेन्स, रिलायबल नेपाल लाइफ र सानिमा लाइफ इन्स्योरेन्स कम्पनीलाई कारबाही गरेको हो।

यी कम्पनी मध्ये राष्ट्रिय बीमा कम्पनी र राष्ट्रिय बीमा संस्थानले धेरै वर्षदेखि लेखापरीक्षण प्रतिवेदन तयार पार्न सकेका छैनन्। समितिले कानूनमा कारबाही गर्न सक्ने व्यवस्था हुँदा हुँदै यसभन्दा अगाडि यसरी कारबाही गरेको थिएन। समितिले धेरै पटक कम्पनीहरुलाई समयमा लेखापरीक्षण गर्न निर्देशन दिँदा पनि नमाने पछि बाध्य भएर यस्तो कारबाही गरेको जनाएको छ।

समितिले बीमा ऐन २०४९ र बीमा नियमावली २०४९ बमोजिम तोकिएको समयसिमाभित्र बीमा समितिमा आर्थिक वर्ष २०७६/७७ मा आफुले गरेको बीमा व्यवसायको हिसाव कितावको लेखापरीक्षण प्रतिवेदन नबुझाएको भन्दै ११ वटा कम्पनीहरुलाई १० हजार रुपैयाँका दरले जरिवाना गर्ने निर्णय गरेको हो।