काठमाडौं- फरवार्ड माइक्रोफाइनान्स वित्तीय कम्पनीको सेयरमा लगानीकर्ता झुम्मिएपछि समग्र नेप्से घट्दा पनि सर्किट लागेको छ। सेयर समायोजनपछि सस्तोमा मूल्यमा सेयर पाउने भएपछि लगानीकर्ताले धमाधम सेयर खरिद गर्न थालेपछि मूल्य बढेको हो। 

साताको दोस्रो दिन कम्पनीको सेयरमूल्य १० प्रतिशत अर्थात प्रतिकित्ता २१७ रुपैयाँले बढेको छ। कम्पनीको सेयर मूल्य प्रतिकित्ता दोस्रो बजारमा २३८७ रुपैयाँमा करोबार भएको छ। लघुवित्तमध्ये पनि उत्कृष्ट सूचक रहेको कम्पनीको सेयरमा लगानीकर्ता झुम्मिएका हुन्। 

११ हजार ८ सय ३३ कित्ता कारोबार भएको कम्पनीको पछिल्लो ५२ हप्तामा ३५३० रुपैयाँसम्म पुगेको थियो भने न्यूनतम २ हजार रुपैयाँसम्म ओर्लिएको थियो। गत वर्ष २०७७/०७८ को नाफाबाट ४२ प्रतिशत लाभांश दिएको कम्पनीको सेयर मूल्य समायोजनपछि पुनः सेयर मूल्य बढेको हो। 

कम्पनीले ७ प्रतिशत नगद लाभांश दिएको थियो भने ३५ प्रतिशत बोनस सेयर गरी ४२ प्रतिशत लाभांश पाइसकेका छन्।