काठमाडौं- अर्थतन्त्रमा गम्भीर समस्या देखिन थालेपछि नेपाल राष्ट्र बैंकले सरोकरवाला निकायसँग समस्या समाधान गर्न शुक्रबार छलफल गरेको छ। छलफलमा बैंकरदेखि उद्योगीहरू समेत सहभागी भएका छन्।

व्यवसायीदेखि बैंकरहरूले तरलता संकटलाई समाधान गर्नका लागि सुझाव दिएका छन्। जसमा मुख्यगरी रेमिट्यान्सलाई व्यवस्थित बनाएर ल्याउन सुझाव दिएका छन्। ‘हामीले रेमिट्यान्स पठाउनेलाई राज्यले प्रोत्साहन घोषणा गरेर रकम च्यानलमार्फत ल्याउन मुख्य सुझाव दिएका छौँ,’ नेपाल उद्योग परिसंघका अध्यक्ष विष्णु अग्रवालले भने।

त्यस्तैगरी विकास खर्चको मुभिलाइजेसन बापत २० प्रतिशत बैंकिङ च्यानलमा पठाउनसमेत आग्रह गरेको आग्रवालले जानकारी दिए। विकास खर्च बढाउने वित्तिकै बैंकमा देखिएको तरलताको संकटसमेत हट्ने भएकोले सोही अनुसारको सुझाव दिइएको अग्रवालले बताए। 

राष्ट्र बैंकले बैंकर र व्यवसायीसँगको छलफलमा विदेशी सञ्चिति, ऋणको अवस्था, विकास खर्च लगायतका विषयमा जानकारी गराएको थियो।

कोभिडपछि विस्तारै लयमा आउन लागेको व्यवसायमा बैंक तथा वित्तीय क्षेत्रमा देखिएको तरलता अभावले समस्या भएको बताएका थिए। छलफलमा नेपाल उद्योग वाणिज्य महांसघ, नेपाल बैंक तथा वित्तिय सञ्चालक संघ लगायतका प्रतिनिधिहरू सहभागी भएका थिए। राष्ट्र बैंकले गरेको ल्याउन लागेको चालु पुँजी कर्जाको व्यवस्थाले समस्या झनै आउनेसमेत छलफलमा बताएका छन्।