काठमाडौं- चालु आर्थिक वर्ष २०८१/०८२ को ६ महिनामा वैदेशिक रोजगारीका लागि जाने युवाको संख्या १३.४२ प्रतिशतले बढेको छ।
वैदेशिक रोजगार विभागका अनुसार चालु आवको साउन, भदौ, असोज, कात्तिक, मंसिर र पुसगरी ६ महिनामा वैदेशिक रोजगारी लागि ३ लाख ९३ हजार ६७ जना युवाले अन्तिम श्रम स्वीकृति लिएका छन्। जुन संख्यालाई विभागले रोजगारीमा जाने युवाको संख्या भन्दै तथ्यांक सार्वजनिक गर्दै आएको छ।
विभागका अनुसार गत वर्ष २०८०/०८१ को सोही अवधिका वैदेशिक रोजगारीका लागि बाहिरिने युवाको संख्या ३ लाख ४० हजार र ३ सय ३० रहेको थियो।
.jpg)
गत आवको महिनागत तुलनामा चालु आवकै सबै महिनामा रोजगारीका लागि विदेश जाने कामदारको संख्यामा वृद्धि आएको छ। विभागका अनुसार चालु आवको पुसमा ६७ हजार २ सय ८५ जना युवा रोजगारीका लागि गएका छन्।
चालु आवकै मंसिरमा इतिहासमै एकै महिनामा सबैभन्दा बढी युवा रोजगारीका लागि बाहिरिएका थिए। मंसिरमा ८४ हजार २ सय २६ जना युवा वैदेशिक रोजगारीका लागि गएका थिए।
यसैगरी चालु आवकै कात्तिकमा ७० हजार ९ सय ९०, असोजमा ५३ हजार ५ सय २५, भदौमा ५७ हजार ४ सय ९३ र साउनमा ५९ हजार ५ सय ७५ जना युवा रोजगारीका लागि विदेश गएका छन्।
गत आवको साउनमा ५५ हजार ५ सय ७५, भदौमा ५० हजार ८ सय ८४,असोजमा ५६ हजार २ सय ३५,कात्तिकमा ४३ हजार ६ सय २२ मंसिरमा ६८ हजार २ सय १ र पुस ६५ हजार ८ सय १३ जना युवा रोजगारीका लागि बाहिरिएका थिए।
विभागका अनुसार चालु आवको ६ महिनामा नयाँ कामका लागि म्यानपावरमार्फत २९ हजार ३ सय १६, नयाँ व्यक्तिगत भिसामार्फत १० हजार ८५, विबिदामा नेपाल आए/ पुन: फर्कने २७ जार २ सय ३ र जीटूजी मार्फत कोरिया र इजायल जानेको संख्या ६ सय ५४ रहेको छ।
विभागका अनुसार ६ महिनामा नयाँ काममा लागि म्यानपावरमार्फत विदेश जानेको संख्या १ लाख ६१ हजार १ सय ६६, नयाँ व्यक्तिगत भिसामार्फत जानेको संख्या ६४ हजार ४ सय ५९, बिदामा नेपाल आएर पुन: रोजगारीकै लागि जानेको संख्या १ लाख ६२ हजार ६ सय २८ र जीटूजी मार्फत कोरिया र इजायल जानेको संख्या ४ हजार ८ सय १४ रहेको छ।
