काठमाडौं- बैंकहरू मर्जरमा जाने एकपछि अर्को चर्चा चलिरहँदा अहिले प्रभु बैंक र सेञ्चुरी बैंकबीच पनि मर्जरमा जानेगरी छलफल चलेको छ।

हिमालयन र इन्भेष्टमेन्ट बैंकको मर्ज भाँडिएपछि यतिबेला धेरै बैंकहरू मर्जमा जानेगरी अनौपचारिक रूपमा तीब्र छलफलमा लागिरहेका छन्।

गत साता नबिलले नेपाल बंगलादेश बैंकलाई प्राप्ति (एक्वायर) गर्ने सम्झौता गरेको थियो।

मर्जका लागि हिमालयन र सिभिलको चर्चा पनि चलिरहेको छ। यता सनराइज र माछापुच्छ्रे बैंकको पनि मर्जको चर्चा चलिरहेको बेला प्रभु र सेञ्चुरी बैंकले पनि मर्जका लागि स्वाप रेसियोसमेतमा छलफल थालेका छन्। 

प्रभुले अन्य बैंकसँग मर्जका लागि प्रस्ताव गरेको थियो तर सेञ्चुरीले प्रभुको प्रस्तावमा सहमति जनाउनेगरि छलफल गरिरहेको छ। स्वाप रेसियोमा प्रभुसँग १०० बराबर ८८ हुने गरि सेञ्चुरीले माग गरेको छ। तर प्रभुले भने ८५ दिन तयार रहेको बुझिएको छ। 

दोस्रो त्रैमासमा सेञ्चुरी बैंकले ५४ प्रतिशत नाफा बढाएको वित्तीय विवरण सार्वजनिक गरेको छ। बैंकले दोस्रो त्रैमासमा ७२ करोड २१ लाख रुपैयाँ खुदनाफा कमाएको छ। प्रभुले चालू आर्थिक वर्षको दोस्रो त्रैमासमा १ अर्ब २६ करोड रुपैयाँ खुदनाफा गरेको छ । 

सेञ्चुरीको चुक्त पुँजी ९ अर्ब ५५ करोड रुपैयाँ रहेको छ। बुधबार दोस्रो बजारमा २५३ रुपैयाँमा कारोबार भएको थियो। त्यस्तै प्रभुको चुक्ता पुँजी १२ अर्ब ७० करोड रुपैयाँ रहेको छ भने दोस्रो बजारमा बुधबार ३२७ रुपैयाँमा कारोबार भएको छ।