सिराहा- चालु आर्थिक वर्ष २०८१/०८२ को झण्डै ६ महिना बित्दा लहान नगरपालिकाकोे पुँजीगत खर्च तीन दशमलव ४५ प्रतिशतमात्रै भएको छ। शुक्रबार नगरपालिकाको १५औँ हिउँदे नगरसभामा नगरप्रमुख महेशप्रसाद चौधरीले १४औँ नगरसभाबाट पारित नीति तथा कार्यक्रमको विस्तृत खर्च समीक्षा गर्दै उक्त विवरण प्रस्तुत गरेका हुन्।

नगरप्रमुख चौधरीका अनुसार १४औँ नगरसभाबाट पारित जम्मा एक अर्ब २३ करोड एक लाख ९२ हजार रूपैयाँ आय र व्ययको अनुमानसहितको वार्षिक बजेटबाट हालसम्म जम्मा २८ करोड ५६ लाख ५० हजार रूपैयाँ खर्च भएको छ। यसमध्ये चालु खर्चतर्फ २४ करोड २३ लाख तीन हजार रूपैयाँ अर्थात् १९ दशमलव ७० प्रतिशत रहेको छ।

त्यसैगरी पुँजीगत अर्थात् विकास खर्चतर्फ चार करोड ३३ लाख ४७ हजार रूपैयाँ अर्थात् तीन दशमलव ४५ प्रतिशत खर्च भएको हो।

यहाँ २४ वटा वडा रहेका छन्। नगरप्रमुख चौधरीले १४औँ नगरसभाबाट पारित नीति तथा कार्यक्रमको विस्तृत खर्च समीक्षा तथा संशोधित आय र व्ययको अनुमानका आधार योजना तथा कार्यक्रम दुई दिन चल्ने बन्दसत्रमा छलफल गरी पारित गर्ने जानकारी दिए।

शुक्रबार उद्घाटन गरिएको १५औँ हिउँदे नगरसभाको उद्घाटन उपप्रधान तथा सहरी विकासमन्त्री प्रकाशमान सिंहले गरेका थिए। स्थानीय शासन सञ्चालन ऐन, २०७४ मा नगरसभा वर्षमा दुई पटकसम्म गर्न सकिने भनी उल्लेख गरिएको छ। रासस