काठमाडौं- गएको साता ७३.५९ अंकले वृद्धि भएको सेयर बजार मापक नेप्से परिसूचक यो साता कारोबारको पहिलो दिन आइतबार १०.८३ अंकले घटेको छ।
आइतबार बजार १०.८३ अंकले घटेर २९२०.५१ बिन्दुमा पुगेको हो। आइतबार ७ अर्ब ३ करोड रूपैयाँको कारोबार भएको छ। जहाँ ४६ कम्पनीको सेयर मूल्य बढ्दा १३८ कम्पनीको मूल्यमा गिरावट आएको छ भने ७ कम्पनीको सेयर मूल्य परिवर्तन भएको छैन।
गएको साताको पाँच दिनको कारोबारमा नेप्से परिसूचक ७३.५९ अंकले बढेर २९३१.५९ बिन्दुमा पुगेको थियो। त्यसअघिको साता बजार १६५.२८ अंकले बढेको थियो। यो साता आइतबार बजार घटेपनि लगानीकर्ता अतालिनुपर्ने अवस्था नरहेको विश्लेषकहरू बताउँछन्।
बजार ३२०० सयबाट घट्दै बढ्दै गर्दा २२०० बाट टेको लागेर अगाडि बढेकोले अबको बजार ३२०० भन्दा माथि जाने प्राविधिक तथ्यांकले देखाउने विश्लेषकहरूले बताइरहेका छन्। तीन सातादेखि सकारात्मक देखिएको बजारमा आइतबार देखिएको गिरावट सामान्य ब्रेक मात्र भएको विश्लेषकहरूको तर्क छ। केही करेक्सनपछि बजार पुन: उचाइमा बढ्ने उनीहरू बताउँछन्।
चुनावको मिति तोक्ने कि नतोक्ने भन्ने विषयमा सरकार अलमलमा परिरहेका बेला सेयर लगानीकर्ता पनि पर्ख र हेरको नीतिमा देखिएको समेत बताइएको छ। प्राय चुनावी वर्ष सेयर बजार उच्च अंकमा जाने गरेको छ। आगामी बैशाखसम्म स्थानीय चुनाव गर्न सरकारलाई संवैधानिक बाध्यता पनि छ।
