काठमाडौं- आइतबार प्रतितोला १ हजार ७ सय रूपैयाँले बढेको सुनको मूल्य सोमबार प्रतितोला १५ हजार ९ सय रुपैयाँले घटेको छ। सरकारले भन्सार महसुल घटाएपछि सोमबार सुनको मूल्य व्यापक घटेको हो। 

नेपाल सुनचाँदी व्यवसायी महासंघका अनुसार आइतबार १ लाख ६७ हजार २ सय रुपैयाँमा कारोबार भएको सुन सोमबार १ लाख ५१ हजार ३ सय रुपैयाँमा कारोबार भइरहेको छ। 

यस्तै आइतबार प्रतितोला १ हजार ९ सय ६० रूपैयाँमा कारोबार भएको चाँदी सोमबार प्रतितोला १ हजार ८ सय ४५ रुपैयाँमा कारोबार भइरहेको छ।

गएको बिहीबारको मन्त्रिपरिषदको बैठले सुनको भन्सार महसुल १० प्रतिशतमा झार्ने निर्णय गरेको हो। त्यस्तै चाँदीको भन्सार महसुल पनि सरकारले घटाएको छ। चाँदीको महसुल पनि १० प्रतिशतमा झारिएको छ। यसअघि सुनको भन्सार २० प्रतिशत थियो भने चाँदीको पनि २० प्रतिशत नै थियो। 

गएको कात्तिक १५ गते सुनको मूल्य अहिलेसम्मकै उच्च १ लाख ७० हजार ७ सय रुपैयाँमा कारोबार भएको थियो। 

नेपालमा अन्तर्राष्ट्रिय मूल्यका आधारमा सुनको भाउ निर्धारण गरिन्छ। अन्तर्राष्ट्रिय बजारमा अघिल्लो दिन राति १२ बजे कायम भएको प्रतिऔँस सुनको मूल्य भोलिपल्ट भन्सार दर, बैंकको लागत र नाफा, वैदेशिक विनियम दर र व्यवसायीको नाफा जोडेर मूल्य तय गरिन्छ।

नेपालमा सुनको भन्सार घटेपछि अब रोकिएला मौलाएको तस्करी?