काठमाडौं- संसारकै धनाढ्य तथा अमेरिकी प्रभावशाली व्यवसायी एलन मस्कसँग प्रधानमन्त्री केपी शर्मा ओलीले कुराकानी गरेका छन्।
ओलीले केहीबेरअघि मस्कसँग भिडियो कलमा कुराकानी गर्दैगरेको जानकारी गराउँदै फोटो फेसबुकमा पोष्ट गरेका छन्।
मस्कको कम्पनी स्टारलिंकले नेपालमा आउन खोजिरहेको समयमै प्रधानमन्त्री र मस्कबीच कुराकानी भएको हो।
स्टारलिंकले नेपालमा पनि सेवा दिन खोजेको छ। स्टारलिंकले आफ्नो वेबसाइटमा नेपाललाई सम्भावित सेवा सुरु हुने देशको सूचीमा सामेल गरेको छ। नेपाल आएर कम्पनीले छलफल गरेपनि कानूनी अड्चनका कारण रोकिएको छ।
ओली सरकार गठनपछि पनि स्टारलिंकका प्रतिनिधिले विभिन्न तहमा भेटघाट गरेका छन्। तर कानून संशोधन नगरी स्टारलिंक आउने सम्भावना छैन।
नेपालको नियमअनुसार २० प्रतिशत स्वामित्व स्थानीय हुनुपर्ने छ तर स्टारलिंकले कसैलाई पनि सेयर नदिने नीति लिएको छ। यही कारण नियममा लचिलो बनिदिन स्टारलिंकका प्रतिनिधिहरूले नेपाल सरकारसँग पटकपटक आग्रह गरेका छन्।
स्याटेलाइट ब्रोडब्यान्ड सेवाका लागि ‘ग्लोबल मोबाइल पर्सनल कम्युनिकेसन बाई स्याटेलाइट सर्भिस’ लाइसेन्स लिनुपर्छ। यस्तो लाइसेन्सको व्यवस्था पनि नेपालको कानूनमा छैन।
अन्तरिक्षमा अहिलेसम्म २ हजार ७ सय स्याटेलाइट रहेका छन्। यसलाई स्टारलिंकले १२ हजार पुर्याएर दुनियाँको सबै हिस्सामा इन्टरनेट सम्भव बनाउने लक्ष्य लिएको छ।
न्यून लेटेन्सी र उच्च गतिको इन्टरनेट पृथ्वीको सबै भूभागमा पुर्याउने लक्ष्य लिएको स्टारलिंकले अहिले भने १५० एमबीपीएसको गति दिएको दाबी गरेको छ।
