काठमाडौं- बैंकिङ प्रणालीमा करिब ७ खर्ब ८० अर्ब रूपैयाँ अधिक लगानीयोग्य रकम भएपछि अन्तरबैंक ब्याजदर ३ प्रतिशतभन्दा तल आएको छ। राष्ट्र बैंकको पछिल्लो तथ्यांकअनुसार अन्तरबैंक ब्याजदर २.९९ प्रतिशतमा झरेको छ।
अन्तरबैंक ब्याजदर ३ प्रतिशतभन्दा तल आएपछि राष्ट्र बैंकले आजै प्रणालीबाट ४० अर्ब तरलता प्रशोचनका लागि बोलपत्र आह्वान गरेको छ।
राष्ट्र बैंकले ब्याजदर कोरिडोरको तल्लो सीमा ३ प्रतिशत तोकेर राष्ट्र बैंकले सोही ब्याजदरमा बैंक वित्तीय संस्थाहरुसँग तरलता खिचिरहेको छ।
निक्षेप संकलनको तुलनामा कर्जा प्रवाह नभएपछि साधारण बचतकर्तालाई ३ प्रतिशतभन्दा कम ब्याजदर नदिन भन्दै राष्ट्र बैंकले प्रणालीबाट निक्षेप खिचिरहेको छ।
राष्ट्र बैंकले स्थायी निक्षेप सुविधा र निक्षेप संकलन उपकरणमार्फत बजारबाट तरलता प्रशोचन गरिरहेको छ।
राष्ट्र बैंकको पछिल्लो तथ्यांकअनुसार बैंकिङ प्रणालीबाट ६६ खर्ब ४० अर्ब रूपैयाँ निक्षेप र ५२ खर्ब ८७ अर्ब रूपैयाँ कर्जा प्रवाह गरेका छन्।
यस अवधिमा बैंकहरुको औसत कर्जा निक्षेप अनुपात ७८.२८ प्रतिशत रहेको छ।
