काठमाडौं- पुनः हकप्रद दिने भएपछि अपि पावर कम्पनीको सेयर कारोबारमा हरेक दिन रेकर्ड बन्दै गएको छ। अपि पछिल्लो समय सेयर कारोबार धेरै हुने सूचीमा पर्दै आएको छ।
समग्र नेप्से परिसूचक घटेपनि बुधवार अपि पावरको भने सर्वाधिक कारोबार भएको छ। अपिको बुधवार २० करोड ३२ लाख रुपैयाँ बराबरको सेयर कारोबार भएको छ।
अपिको ३ लाख ७० हजार कित्ता कारोबार भएको हो। कम्पनीको पछिल्लो सातादेखि उच्च कारोबारको सूचीमा पर्दै आएको छ। बुधवार अपिको प्रतिकित्ता ५४४ रुपैयाँ प्रतिकित्ता मूल्यमा कारोबार भएको थियो।
५२ हप्तामा अधिकतम ६७० रुपैयाँसम्म पुगेको सेयर मूल्य न्यूनतम २५६ रुपैयाँमा कारोबार भएको थियो। ०७७/७८ को नाफाबाट ११.०५ प्रतिशत लााभांश घोषणा गरेको कम्पनीले १०.५ प्रतिशत बोनस सेयर र ०.५५ प्रतिशत नगदर लाभांश दिनेछ। यो लाभांश कम्पनीले हालसम्मकै धेरै प्रस्ताव गरेको हो।
कम्पनीको चुक्ता पुँजी २ अर्ब ७५ करोड ८९ लाख रुपैयाँ रहेको छ। नेप्सेमा २ करोड ७५ लाख ८९ हजार १ सय ७५ कित्ता सेयर नेप्सेमा सूचीकृत कम्पनीको बजार मूल्यांकन ११ अर्ब १४ करोड ६० लाख रुपैयाँ पुगेको छ।
गत वर्ष पनि हकप्रद दिएको कम्पनीले पुनः १ करोड ८६ हजार कित्ता हकप्रद ल्याउन लागेको छ। अपिले ०ः३९ कित्ता हकप्रदको प्रस्ताव गरेको हो। अपिले मुक्तिनाथ क्यापिटललाई व्यवस्थापक नियुक्त गरिसकेको छ।
अपिले चालु आर्थिक वर्षको पहिलो तीन माहिनामा ७ करोड ६६ लाख ७९ हजार रुपैयाँ खुद नाफा कमाएको थियो भने प्रतिसेयर आम्दानी ११.१२ रुपैयाँ रहेको छ।
