काठमाडौं- क्यानडामा अध्ययनरत विद्यार्थीको कलेज शुल्क भराइदिन्छु भन्दै ठगी गर्ने एकजना पक्राउ परेका छन्।

हाल भक्तपुर बस्ने सिन्धुपाल्चोक बलेफीका ४३ वर्षीय गोकर्ण पराजुलीलाई प्रहरीले पक्राउ गरेको हो।

अध्ययनको सिलसिलामा क्यानडामा रहेको छोराको कलेज शुल्क तिर्नको लागि ह्वाट्सएपमार्फत क्यानडामा रहेको बताउने मनिष परियारसँग कुराकानी भइ निजले क्यानडामा रहेको आफ्नो साथी गोकर्णले पीडितको छोराको कलेज शुल्क बुझाइदिने भनेर सम्पर्क गराएका थिए। ८ लाख १७ हजार रूपैयाँ पठाउन लगाएर ठगी गरेको अभियोगमा गोकर्णलाई प्रहरीले बुधबार पक्राउ गरेको हो।

उनीउपर ठगीसम्बन्धी कसुरमा आवश्यक अनुसन्धान एवम् कारबाहीको लागि जिल्ला प्रहरी परिसर काठमाडौं भद्रकाली पठाइएको प्रहरीले जनाएको छ।