काठमाडौं- वरिष्ठ पर्यटन व्यवसायी देवेन्द्र वाग्लेको निधन भएको छ। 

गोरखाको बुङकोटमा जन्मिएका ५५ वर्षीय वाग्ले बिरामी भएर हेम्स अस्पतालमा धुम्बाराहीमा उपचार गराइरहेका थिए। अस्पतालमा नै आइतबार साँझ ६:५८ मा उनको निधन भएको पारिवारिक स्रोतले जानकारी दिएको छ। उनको साेमबार विहान पशुपति आर्यघाटमा दाह संस्कार गरिने भएकाे छ। 

तीन दशकदेखि पर्यटन व्यवसायमा आवद्ध वाग्लेले एक दर्जनभन्दा बढी कम्पनी चलाउँदै आएका थिए। उनका अप्सरा बुटिक होटल, ब्लु हाेराइजन लगायत आधा दर्जन होटल नै रहेका छन्। 

सन् १९९२ मा नेपाल भिजन ट्रेक्स कम्पनीबाट पर्यटन व्यवसाय सुरु गरेका वाग्लेको ट्राभल्स एक्सिडिसन होटलसमेत सञ्चालनमा छन्। भिजनसँगै वाग्लेका एक दर्जन ट्रेकिङ कम्पनी सञ्चालनमा रहेका छन्। 

खासगरी ठमेल क्षेत्रमा उनको ट्रेकिङ ट्राभलदेखि होटलसमेत सञ्चालनमा रहेका छन्। होटल संघ नेपाल हानका पूर्व सदस्यसमेत रहेका वाग्लेले गोरखा र धादिङका सयौँ स्थानीयलाई रोजगारी दिँदै आएका थिए। रोजगारीसँगै व्यवसायसमेत संचालनमा सहयोग गर्ने वाग्लेसँगै काम गर्ने सयौँ गाइड र सहयोगीहरुले अहिले आफ्नै कम्पनी सञ्चालन गर्दै आएका छन्।

कांग्रेस नेता चिरञ्जीवी वाग्लेका छोरा देवेन्द्र वाग्ले सक्रिय राजनीतिमा समेत होमिएका थिए। उनी कांग्रेसको महासमिति सदस्यसमेत थिए।