काठमाडौं- अमेरिकी अर्बपति एलन मस्क अमेरिकी राष्ट्रपति पदका उम्मेद्वार डोनाल्ड ट्रम्पको पक्षमा खुलेरै लागेका थिए। ट्रम्पलाई जिताउन दिलोज्यान दिएर लागि परेका मस्कले अर्बौँ डलर खर्चसमेत गरेका थिए।
बुधबार साँझसम्म अमेरिकी राष्ट्रपतिमा डोनाल्ड ट्रम्पको विजय निश्चित भइसकेको थियो। उक्त परिणामपछि एलन मस्कको सम्पत्ति एकैदिन २० अर्ब ९० करोड डलरभन्दा बढीले बढेको छ। ट्रम्पको विजयलगत्तै मस्कको सम्पत्ति एकैदिन करिब ८ प्रतिशतले बढेको हो।
फोब्र्सको रियल टाइम अर्बपति सूचीका अनुसार मस्कले एकैदिन करिब २१ अर्ब डलर बढाएर उनको कुल सम्पत्ति २ सय ८५ अर्ब ६० करोड डलर पुगेको छ।
यो सम्पत्ति बढोत्तरीपछि राजनैतिक घटनाक्रमपछि विश्व वित्तीय बजारमा कति र कसरी प्रभाव पर्छ भन्नेसमेत देखाएको इकोनोमिक टाइम्सले लेखेको छ। ट्रम्पको विजय हुने सुनिश्चित भएसँगै लगानीकर्तामा लगानी गर्ने माहोल बनेकाले मस्कको सस्पत्ति बढेको दाबी गरिएको छ।
एलन मस्क विश्वको चर्चित विद्युतीय कार निर्माता कम्पनी टेस्ला इंकका संस्थापक तथा सीईओ हुन्। त्यस्तै उनी स्पेस एक्सका सीईओ तथा प्रविधिसम्बन्धी अन्य कम्पनीहरुमा पनि लगानी गरेका छन्। टेस्लाको सेयर उल्लेख्य वृद्धि भएकाले मस्कको सम्पत्ति बढेको हो।
राष्ट्रपति निर्वाचनको नतिजा आएसँगै टेस्लाको सेयर मूल्य १४.८ प्रतिशत बढेको थियो। टेस्लाले आफ्नो बजार हिस्सा केही गुमाउँदासमेत टेस्लाको मूल्य बढेको हो। यही दिन अन्य विद्युतीय कार उत्पादक नियो, रिभियन, लुसिडलगायत कम्पनीको सेयर मूल्य भने घटेको थियो।
अमेरिकी बजारमा विद्युतीय कारतर्फ ४८.९ प्रतिशत बजार हिस्सासहित टेस्ला अग्रस्थानमा रहेको छ। एलन मस्क संसारका सबैभन्दा धनी व्यक्ति पनि हुन्।
