कञ्चनपुर- बारीमा फूल फुलेर पहेँलपुर छन्। कोही फूल टिप्दैछन् त कोही माला उन्नमा व्यस्त छन्। फूल किन्ने ग्राहकको पनि घुइँचो नै छ।
कञ्चनपुरको दोधारा चाँदनी नगरपालिका-८ सुन्दरनगरका प्रेम रोकायालाई हाल फूल बिक्री गर्न भ्याइनभ्याइ छ। तिहारका लागि फूलको माग बढेको उनको भनाइ छ।
'तिहारका लागि फूलको माग असाध्यै छ। मागअनुसार फूल पुर्याउन भ्याइनभ्याइ छ', उनले भने, 'कोही बारीमै पुगेर फूल किनिरहेका छन्। कतिपयले फोनबाट फूलको माग गरेका छन्।'
पछिल्लो समय रोकाया मागअनुसार फूल पुर्याउन मोटरसाइकल बिहानैदेखि दौडधुप गरिरहन्छन्। फूल बिक्रीका लागि कहिले दोधारा चाँदनी त कहिले सदरमुकाम महेन्द्रनगर पुग्ने गरेका छन्।
तिहारमा हालसम्म १५ हजार रुपैयाँको फूल बिक्री गरेको रोकायाको भनाइ छ। 'दिनमा एकपटक महेन्द्रनगरको माग पूर्ति गर्न फूल लिएर आउनुपर्छ। त्यसपछि दोधारा चाँदनीमै व्यस्त भइन्छ', उनले भने, 'तिहार लक्षित गरेर फूलखेती गरिएकाले तिहार सबै फूल बिक्री गरिसक्नुपर्ने हो।'
सुन्दरनगरमा रोकायाले बाह्र कट्ठा जमिनमा फूलखेती गरेका छन्। उनको खेतमा हाल सयपत्री र मखमली फूल फुलेर बिक्रीका लागि तयार छन्। प्रतिकिलो तीन सय रुपैयाँका दरले फूल बिक्री भइरहेको उनले बताए। अझै खेतमा डेढ क्विन्टल फूल बिक्री गर्न बाँकी रहेको उनको भनाइ छ।
'रामलीलालगायत कार्यक्रममा पनि फूल बिक्री भयो। तिहारमा बाँकी फूल सबै बिक्री हुने विश्वास छ', रोकायाले भने, 'पोहोर साल पाँच सय रुपैयाँ किलोका दरले बिक्री भएको थियो। उपभोक्ता महँगो भनेपछि यसपालि मूल्य घटाएको हो।'
बाह्र कट्ठा जमिनमा फूल खेती गर्न ४५ हजार रुपैयाँ लगानी लागेको उनको भनाइ छ। भारतबाट फर्किएर रोकायाले दुई वर्षअघिदेखि फूल खेती थालेका हुन्।
सुरुआतमा भारतबाट रोकायाले फूलको बीउ मगाएर खेती गरेका थिए। 'अब बीउ ल्याउनुपर्ने अवस्था छैन। फूलको बेर्ना आफैँले खेतमा उत्पादन गर्ने गरेको छुँ', उनले भने, 'फूल र माला बेचेर वार्षिक रु एक लाखभन्दा बढी आम्दानी हुन्छ।'
असार अन्तिमतिर राखेको बेर्ना एक महिनामै खेतमा सार्नका लागि तयार हुन्छ। साउनमा खेतमा सारेको फूलको बेर्ना असोजदेखि बिक्रीका लागि तयार हुने गरेको उनको भनाइ छ। रासस
