काठमाडौं- साताको दोस्रो दिन सोमबार पनि अरुण भ्याली हाइड्राेपावरको सर्वाधिक कारोबार भएको छ। आइतबार पनि अरुण भ्याली हाइड्रोपावर कम्पनीको सर्वाधिक सेयर खरिदबिक्री भएको थियो।
सोमबार अरुणको ४४ करोड ५४ लाख ९४ हजार रुपैयाँको सेयर कारोबार भएको छ। कम्पनीको सोमबार प्रतिकित्ता ५७१.३० पैसामा कारोबार भएको हो। कम्पनीको सोमबार ७ लाख ९९ हजार २ सय ४ कित्ता सेयर कारोबार भएको छ।
अरुणको आइतबार पनि ३६ करोड ४३ लाख १७ हजार बराबरको सेयर खरिदबिक्री भएको थियो। कम्पनीको सेयर मूल्य प्रतिकित्ता ५३९.५० कायम भएको हो। कम्पनीले ५० प्रतिशत हकप्रद सेयर निष्कासन गर्ने तयारीमा रहेकाले लगानीकर्ताको आकर्षणमा परेको देखिन्छ।
कम्पनीको पछिल्लो ५२ हप्तामा ७८५ मा अधिकतम मूल्यमा कारोबार भएको थियाे भने न्युनतम २२७ रुपैयाँमा प्रतिकित्ता काराेबार भएकाे थियाे।
कम्पनीले गत आवको नाफाबाट १० प्रतिशत बोनस सेयर वितरण पछि कायम चुक्तापुँजी ५० प्रतिशत अर्थात १:०.५ अनुपातमा हकप्रद सेयर निष्कासन गर्ने तयारीमा रहेको छ। बोनस सेयर र हकप्रद सेयर निष्कासन गर्ने प्रस्ताव साधारण सभाबाट पारित भएको छ।
१० प्रतिशत बोनस सेयर वितरणपछि कम्पनीको चुक्तापुँजी १ अर्ब ७२ करोड ५० लाख रुपैयाँभन्दा बढी पुग्नेछ। नियामक निकाय विद्युत् नियमन आयोग र धितोपत्र बोर्डमा निवेदन दिएर स्वीकृति पाएपछि मात्र कम्पनीले हकप्रद सेयर निष्कासन गर्नेछ।
