दमौली- तनहुँको शुक्लागण्डकी नगरपालिका-९ मा अवस्थित प्रसिद्ध ढोरबाराही मन्दिरलाई धार्मिक गन्तव्यस्थलका रुपमा विकास गर्न पहल थालिएको छ। नगरपालिकाले नगरभित्रकै प्रमुख धार्मिकस्थल ढोरबाराही मन्दिरको विकासका लागि पहल थालेको हो।
ढोरबाराही मन्दिरको धार्मिक, ऐतिहासिक र पर्यटकीय सम्भावनाको अध्ययन गरी समग्र विकास तथा व्यवस्थापन गर्ने उद्देश्य राखिएको नगरप्रमुख कृष्णराज पण्डितले जानकारी दिए। सोही उद्देश्य पूरा गर्न केही समय अगाडि मन्दिर परिसरमा संस्कृति, पर्यटन तथा नागरिक उड्डयनमन्त्री बद्रीप्रसाद पाण्डेको उपस्थितिमा अन्तरक्रिया कार्यक्रम गरिएको थियो।
उक्त कार्यक्रममा सहभागी भएका मन्त्री पाण्डेले ढोरबाराही मन्दिरको धार्मिक महत्व अपार रहेको भन्दै यसको विकासमा सरकारले सहयोग गर्ने प्रतिबद्धता जनाएका थिए। नगरपालिकाले ढोरबाराही मन्दिरसम्म पुग्ने बाटोसमेत स्तरोन्नति गरिसकेको छ।
सडकको आवश्यकताअनुसार कालोपत्र र ढलान गरिएको छ। यसले भक्तजनलाई सहजरुपमा मन्दिरसम्म पुग्न सहयोग पुग्ने विश्वास गरिएको छ। नगरपालिकाले ३१ लाख चार हजार नौ सय ४० रूपैयाँको लागतमा उक्त सडक स्तरोन्नति गरेको नगरप्रमुख पण्डितले बताए।
मनोकांक्षा पूरा हुने जनविश्वासका साथ ढोरबाराही मन्दिरको दर्शनका लागि भक्तजन आउने गर्दछन्। मन्दिरमा तनहुँसँगै छिमेकी जिल्ला कास्की, स्याङ्जा, लमजुङ, पाल्पा, गोरखा, चितवन, नवलपरासीलगायत मुलुकका विभिन्न जिल्लाबाट भक्तजन आउने गरेका छन्। जंगलले चारैतिर घेरिएको पहाडको बीचमा मनोरम स्थानमा मन्दिर छ।
मन्दिरसँगै रहेको पोखरी र पोखरीमा रहेको माछाले भक्तजनको मन रमाउँछ। ढोरबाराहीमा रहेको पोखरीमा बेला-बेला लहरी छुट्ने गर्दछ। रहस्यमयी लहरीलाई धार्मिक आस्थाका रुपमा लिइन्छ। ढोरबाराही मन्दिरलाई भगवान् विष्णुको तेस्रो अवतारका रुपमा लिने गरिन्छ।
प्रत्येक १५ मिनेटमा रहस्यमय ढंगले चल्ने पानीको लहरीले ढोरबाराही मन्दिर क्षेत्रको महिमा र महत्व उच्च बनाएको शुक्लागण्डकी-९ का निवर्तमान वडाध्यक्ष लोकनारायण श्रेष्ठले जानकारी दिए। उनले भने, 'प्राकृतिक रूपमा पानी आउन बन्द हुने र फेरि पानीको ठूलो लहरी छुट्ने कारण यस क्षेत्रको धार्मिक एवं पर्यटकीय महत्वलाई बढाएको छ।'
हिमवत्खण्ड पुराणमा समेत चर्चा गरिएको ढोरबाराही मन्दिरमा देवीको चतुर्वाहु मूर्तिसमेत पाइन्छ। यस मन्दिरमा विसं १९०४ देखि चढाइएका घण्टहरू रहेका छन्। ढोरबाराही प्रशन्न हुँदा लहरी छुट्ने किंवदन्ती रहेको छ। पोखरीको मूलबाट पानीको ठूलो भल आउने र एकै छिनमा फेरि स्वतः घट्दै जान्छ। यस पोखरीमा लहरी छुट्नुलाई धार्मिक आस्थासँग तुलना गरिन्छ।
उक्त पोखरीमा हिउँदयाममा केही समय लहरी छुट्दैन। हिउँदको समयमा ढोरबाराही माता माइत जाने भएकाले लहरी नछुट्ने कथन छ। पोखरीको लहरी छुट्ने द्वारमा रजबाम बस्ने गर्दछ। रजबाम विशेषगरी लहरी छुट्ने बेला पोखरी बाहिर निस्कने र उक्त समयमा रजबामको दर्शन गर्दा सौभाग्य प्राप्त हुने विश्वास रहँदै आएको छ।
मन्दिर जीर्णोद्धारका क्रममा फेला परेका घण्टामध्ये एउटा घण्टामा नेवारी भाषामा नेपाल संवत् ९६७ लेखिएको पाइएको छ। मन्दिरमा नयाँ वर्षको दिन, बैशाख महिनाभर, बडादसैँ, चैतेदसैँको नवदुर्गा अवधिभर, श्रीपञ्चमी र हिउँदयाममा विशेष पूजाअर्चनाका लागि दर्शनार्थीको अत्यधिक भीड लाग्ने गर्दछ। एकादशी, औँसी, सोह्रश्राद्ध, तीजको पञ्चमी तथा साउन महिनाभर मन्दिरमा पशुबलि दिइँदैन। रासस
