काठमाडौं- चालु आर्थिक वर्षको पहिलो त्रैमासमा नबिल बैंकले सर्वाधिक नाफा कमाएको छ। यस बैंकले चालु आर्थिक वर्षको पहिलो त्रैमासमा २ अर्ब ५ करोड रुपैयाँ खुद नाफा गरेको छ।

गतवर्षको यसै अवधिमा बैंकले १ अर्ब ४६ करोड रुपैयाँ खुद नाफा गरेको थियो। गत वर्षको तुलनामा बैंकको खुद नाफा ४० प्रतिशतले बढेको छ। 

बैंकको ब्याज आम्दानी र खर्च घटेपनि इम्पियरमेन्ट चार्ज घटेकाले नाफामा वृद्धि देखिएको हो। गतवर्ष यस बैंकले ४ अर्ब १७ करोड खुद ब्याज आम्दानी गरेकोमा यस वर्ष ४ अर्ब १४ करोड खुद ब्याज आम्दानी गरेको छ। 

बैंकको खुद नाफा बढेसँगै खराब कर्जा पनि बढेको छ। यस अवधिमा बैंकको खराब कर्जा बढेर ४.२४ प्रतिशत पुगेको छ।

गत वर्षको यसै अवधिमा बैंकको खराब कर्जा ३.६९ प्रतिशत रहेको थियो। गत वर्षको नाफाबाट बैंकले लाभांश घोषणा गरी नसकेकाले बैंकको वितरणयोग्य नाफा ४ अर्ब ९८ करोड पुगेको छ।