काठमाडौं- चालु आर्थिक वर्षको पहिलो त्रैमासमा एनएमबि बैंकले १ अर्ब १४ करोड ५६ लाख रुपैयाँ खुद नाफा गर्न सफल भएको छ। गत वर्षको यसै अवधिमा बैंकले ९६ करोड ३२ लाख रुपैयाँ खुद नाफा गरेको थियो।

यस अवधिमा बैंकको ब्याज आम्दानी र खर्च घट्दा खुद ब्याज खर्च घटेपनि इम्पियरमेन्ट चार्ज रिभर्सल गरेकाले बैंकको खुद नाफा बढेको हो। 
चालु आर्थिक वर्षको पहिलो त्रैमासमा बैंकले १ अर्ब ९९ करोड खुद ब्याज आम्दानी गरेकोमा गत वर्षको यसै अवधिमा बैंकले २ अर्ब २३ करोड रुपैयाँ खुद ब्याज आम्दानी गरेको थियो। 

नाफामा वृद्धि भएपनि चालु आर्थिक वर्षको पहिलो त्रैमासमा बैंकको खराब कर्जा भने बढेको छ। 

अर्थतन्त्रमा संकुचित भएकाले रिकभरी प्रभावित हुँदा बैंकको खराब कर्जा बढेको हो। चालु आर्थिक वर्षको पहिलो त्रैमासमा बैंकको खराब कर्जा ३.६३ प्रतिशत पुगेको छ। गत वर्षको यसै अवधिमा बैंकको खराब कर्जा २.८४ प्रतिशत रहेको थियो।

गत वर्षको मुनाफाबाट बैंकले लाभांश वितरण नगरेकाले यस अवधिमा बैंकको वितरणयोग्य नाफामा १ अर्ब ६ करोड रहेको छ।