काठमाडौं- चालु आर्थिक वर्षको पहिलो त्रैमासमा नेपाल इन्भेष्टमेन्ट मेगा बैंकको खुद नाफामा ३.८२ प्रतिशतको गिरावट आएको छ। यस वर्ष बैंकले १ अर्ब ४६ करोड खुद नाफा गरेको छ।

गत वर्षको यसै अवधिमा बैंकको खुद नाफा १ अर्ब ५२ करोड रुपैयाँ रहेको थियो। बैंकको खराब कर्जा बढेकाले नाफामा गिरावट आएको हो।

गत वर्षको पहिलो त्रैमासमा ४.८३ प्रतिशत रहेको बैंकको खराब कर्जा बढेर यो वर्षको पहिलो त्रैमासमा बढेर नियामकीय प्रावधानभन्दा माथि ५.८४ प्रतिशत कायम भएको छ।

यस अवधिमा बैंकको ब्याज आम्दानी र खर्च दुबैमा गिरावट आएकाले पनि बैंकको खुद नाफा घटेको हो। गत वर्षको पहिलो त्रैमासमा ११ अर्ब ५० करोड ब्याज आम्दानी गरी ७ अर्ब ३४ करोड रुपैयाँ ब्याज खर्च गरी ३ अर्ब ८७ करोड रुपैयाँ खुद ब्याज आम्दानी गरेको थियो।

तर यस वर्षको सोही अवधिमा ९ अर्ब ८२ करोड ब्याज आम्दानी गरी ५ अर्ब ८५ करोड ब्याज खर्च गर्दै ३ अर्ब ८७ करोड रुपैयाँ खुद ब्याज आम्दानी गरेको छ।

यस त्रैमासमा बैंकको इम्पियरमेन्ट चार्ज समेत बढेको छ। गत वर्षको पहिलो ३ महिनामा ६४ अर्ब रुपैयाँ इम्पियरमेन्ट चार्ज रहेकोमा यस वर्षको सोही अवधिमा ९७ करोड ५१ करोड पुगेको छ।

खराब कर्जामा भएको वृद्धिसँगै बैंकको पहिलो त्रैमासमा नै वितरणयोग्य नाफा २ अर्ब ५० करोडले ऋणात्मक भएको छ। गत वर्षको यसै अवधिमा बैंकको वितरणयोग्य नाफा ८५ करोड ३२ लाख रुपैयाँले ऋणात्मक रहेको थियो।