काठमाडौं- चालु आर्थिक वर्ष २०८१/०८२ को तीन महिनामा वैदेशिक रोजगारीका लागि विदेश जाने युवाको संख्या ५ प्रतिशतले बढेको छ।
वैदेशिक रोजगार विभागका अनुसार चालु आवको साउन, भदौ र असोजगरी तीनमा महिनामा वैदेशिक रोजगारी लागि १ लाख ७० हजार ५ सय ९३ युवा विदेशिएका छन्।
विभागका अनुसार यो संख्या गत आवको सोही अवधिको तुलनामा करिब ५ प्रतिशतले बढी हो। गत वर्षको सोही अविधिमा वैदेशिक रोजगारीका लागि विदेश जाने युवाको संख्या १ लाख ६२ हजार ६ सय ९४ जना थियो।
चालु आवको असोजमा ५३ हजार ५ सय २५, भदौमा ५७ हजार ४ सय ९३ र साउनमा ५९ हजार ५ सय ७५ जना युवा रोजगारीका लागि विदेश गएका छन्।
यसैगरी गत आवको साउनमा ५५ हजार ५ सय ७५, भदौमा ५० हजार ८ सय ८४ र असोजमा ५६ हजार २ सय ३५ जना युवा वैदेशिक रोजगारीका लागि विदेश पलायन भएका थिए।
विभागका अनुसार मेलेसियाको रोजगारी बन्द हुँदा युवाको रोजाईमा यूएईलगायतका खाडी देश परेको छ। ३ महिनामै वैदेशिक रोजगारीका गएमा मध्ये ३१ प्रतिशत युवा यूएई पुगेका छन्।
३ महिनामा ५३ हजार ८ सय ३३ जना युवा रोजगारीका लागि यूएई गएका छन्। विभागका अनुसार साउनमा १७ हजार ५ सय ४, भदौमा १८ हजार ६ सय ५ र असोजमा १७ हजार ७ सय २४ जना कामदार रोजगारीका लागि यूएई पुगेका छन्।
