काठमाडौं- पर्यटन व्यवसायी वसन्तराज मिश्रको निधन भएको छ। ४० वर्षदेखि पर्यटन व्यवसायमा आवद्व टेम्पल टाइगर ग्रुपका कार्यकारी अध्यक्ष व्यवसायी मिश्रको ७२ वर्षको उमेरमा निधन भएको हो।
विस २००९ साल माघमा जन्मिएका मिश्रको आइतबार बिहान निधन भएको परिवारिक स्रोतले जानकारी दिएको छ। उनलाई डेंगी र ब्रेन ह्माम्रेज भएको थियो।
मिश्र प्यासिफिक एसिया ट्राभल एसोसिएसन (पाटा) इन्टरनेसनलका पूर्वसचिव तथा कोषाध्यक्षसमेत थिए। उनी पाटा नेपाल च्याप्टरका पूर्वअध्यक्ष तथा एशोसिएसन अफ टुर अपरेटर्सका पूर्वअध्यक्षसमेत थिए।
नेपाल पर्यटन बोर्डका संस्थापक सदस्य तथा चिलीका अवैतनिक वाणिज्यदूत मिश्र नेपालमा ‘वाइल्ड लाइफ टुरिजम’ का पायोनियर मानिन्छन्।
अन्तर्राष्ट्रिय पर्यटन बजारमा नेपाली व्यवसायीको प्रतिनिधित्वसमेत गर्दै आएका मिश्र नेपालमा खर्चालु तथा गुणस्तरीय पर्यटक भित्र्याउने कम व्यवसायीमध्ये पर्दथे। मिश्रले कल्याणकारी संस्था बनाएर सामाजिक सेवाका विभिन्न क्षेत्रमा पनि काम गर्दै आएका थिए।
एक छोरा र श्रीमती भएका मिश्रको आज आइतबार नै अन्तिम संस्कार गरिनेछ।
