इटहरी- सुनसरीको दुहबी नगरपालिकामा अवस्थित हुनुमन्ते पोलीमरको गोदाममा सल्किएको आगो १२ घण्टापछि निभाइएको छ। बुधबार राति ८ बजेदेखि सल्किएको आगो बिहीबारमात्र नियन्त्रणमा आएको हो। 

गोदामको बाहिर ठूलो पर्खाल भएको कारण आगो नियन्त्रणमा लिन समय लागेको हो। इटहरी उपमहानगरपालिका र दुहबी नगरपालिकाका दमकल प्रयोग गरेपनि पर्खालको कारण आगो नियन्त्रणमा लिइएको थियो। 

आगलागीबाट यकिन कति क्षति भएको प्रस्ट नभए पनि १५ करोड बराबरको सामग्री र मेसिनहरू जलेर नष्ट भएको उद्योगको सञ्चालक प्रिन्स अग्रवाल बताउँछन्।

लामो समयसम्म आगो नियन्त्रण नभएपछि क्षतिको अनुपात बढेको बताउँदै उनले उद्योग व्यवसायमा ठुलो चोट परेको बताए। दसैँ लागेपछि कर्मचारी र कामदारलाई दिउँसै छुट्टी दिइएको र कोही पनि नभएको बेला आगलागी भएको उनको भनाइ छ। 

गोदाममा रहेका महत्त्वपूर्ण मेसिन र उपकरणहरूसमेत जलेर काम नलाग्ने भएको उनले जानकारी दिए। के कारण आगोलागि भयो भन्नेबारे यकिन हुन बाँकी रहेको उनले सुनाए।